Дар робита ба паҳншавии сирояти коронавирус дар саросари дунё, корхонаи дӯзандагии “Тоҷтекс”-и шаҳри Душанбе ба истеҳсоли ниқобҳои тиббӣ оғоз кард.
“Бо мақсади пешгирии паҳншавии бемории сироятӣ аз ҷониби корхонаи мазкур айни замон истеҳсоли ниқобҳои тиббӣ ва хилъатҳои муҳофизатии махсуси тиббӣ дар асоси фармоиши мизоҷон ба роҳ монда шудааст”, – хабар медиҳад Вазорати саноат ва технологияҳои нави Тоҷикистон.
Гуфта мешавад, айни замон иқтидори корхона дар як рӯз истеҳсоли 10 ҳазор дона ниқобҳои тиббӣ буда, сифати он ба стандартҳои ҷорӣ ҷавобгӯ мебошад.
Ба иттилои манбаъ, дар корхона зиёда аз 160 дастгоҳи дӯзандагӣ насб гардида, барои 200 нафар ҷойҳои корӣ муҳайё карда шудааст.
Қаблан зикр шуда буд, ки як қатор корхонаҳои саноати хӯроквории Тоҷикистон барои татбиқи чораҳо дар самти пешгирии сироятии коронавирус ба истеҳсоли маводи антисептикӣ оғоз карданд.
Тибқи маълумоти Вазорати тандурустӣ ва ҳифзи иҷтимоии аҳолии ҷумҳурӣ, то имрӯз, 8-уми апрел дар Тоҷикистон сирояти коронавирус ба қайд гирифта нашудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
