Ҳукумати Тоҷикистон тартиби бақайдгирии воситаҳои мобилии алоқаи барқӣ ва вазифаҳои системаи давлатии муайянсозии воситаҳои мобилии алоқаи барқиро тасдиқ кард. Зарурати қабули чунин тадбирҳо таъмини амният ва таҳкими иқтидори мудофиавии давлат маънидод мешавад.
Бақайдгирии воситаҳои мобилии алоқаи барқӣ (телефонҳои мобилӣ, смартфон, планшет, компютерҳои хурд, ноутбук ва дигар воситаҳо) тибқи идентификатори байнулмилалии воситаҳои мобилии алоқаи барқӣ (минбаъд – система) ба роҳ монда мешавад.
Бо қарори 31-уми марти соли равон қабулкардаи ҳукумат ба Хадамоти алоқа супориш дода мешавад, ки то 1-уми июни соли 2020 тибқи қонунгузории Тоҷикистон бо ҷалби сармоягузории хусусӣ оператори системаро муайян кунад.
Бақайдгирии воситаҳои мобилӣ аз лаҳзаи ҷорӣ кардани система дар давоми 3 моҳ дар асоси таҷрибавӣ ба таври ройгон тариқи низоми автоматӣ бо роҳи пайвастшавӣ (фаъолкунӣ) ба шабакаҳои операторони алоқаи барқӣ оғоз мешавад.
Сипас бақайдгирӣ дар давоми 6 моҳ дар асоси таҷрибавӣ ба таври ройгон тариқи истифода аз портали ягона ё бо усули дигаре, ки дар тартиби мазкур муайян шудаанд, гузаронида мешавад.
Пас аз ин бақайдгирӣ ба таври музднок тибқи тартиби муқарраркардаи қонуни ҶТ “Дар бораи алоқаи барқӣ” сурат мепазирад.
“Бақайдгирӣ барои воситаҳои мобилии алоқаи барқӣ, ки истифода мешаванд, барои фурӯш ё истифодаи шахсӣ ворид карда мешаванд, дар қаламрави Тоҷикистон истеҳсол мешаванд, ба ҷуз воситаҳои мобилии дар қаламрави Тоҷикистон дар роуминги байнулмилалӣ қарордошта ҳатмӣ мебошад”, – қайд шудааст дар ин санад.
Гуфта мешавад, шахсоне, ки талаботи тартиби қабулшударо риоя намекунанд, мувофиқи қонунгузории кишвар ба ҷавобгарӣ ҷалб карда мешаванд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
