Кумитаи ҳолтаҳои фавқулодаи Тоҷикистон бо истинод ба Агентии обуҳавошиносии ҷумҳурӣ хабар медиҳад, ки давраи рӯзҳои 3 то 7 октябри соли ҷорӣ вақтҳои шабона дар ноҳияҳои кӯҳии кишоварзии ҷумҳурӣ (баландиҳои зиёда аз 2000 метр аз сатҳи баҳр) дар қабати хок сармозании бармаҳали тирамоҳӣ то 0-2 дараҷа хунукӣ пешгӯӣ мешавад.
“Ҳарорати пасти ҳаво боиси зиён дидани сабзавотҳои ноғундошта гардида, нигоҳубин ва чаронидани чорворо мушкил мегардонад”, – омадаст дар хабар.
Аз ин рӯ, Кумита тавсия медиҳад, ки барои саривақт ва беталаф ғундоштани ҳосил кӯшиш ба харҷ дода шуда, он бо маводи зарурӣ, аз қабили пленка ё коҳ пӯшонида шавад.
“Ба бахши чорводорӣ таваҷҷуҳи хосса зоҳир намуда, ҳангоми чаронидани чорво дар чарогоҳҳои кӯҳӣ аз эҳтиёт кор гирифтан зарур аст”, – қайд мекунанд дар КҲФ.
Дар маълумоти Кумита ҳамчунин ба ронандагон аз эҳтимоли хавфу хатар дар роҳҳои мошингард ҳушдор дода мешавад.
Гуфта мешавад, боришот ва сардӣ ба ҳаракати нақлиёт монеъа эҷод карда, инчунин ба зиёд шудани ҳодисаҳои садамаи нақлиёт боис шуда метавонанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
