Дар идомаи тағйироти кадрӣ, имрӯз ҳамчунин Исматзода Азизулло аз мақоми сардори Агентии хоҷагии ҷангали назди Ҳукумати Ҷумҳурии Тоҷикистон озод шуд.
Ҳамчунин бо қарорҳои Ҳукумати Тоҷикистон ректори як қатор Донишгоҳу донишкадаҳои Тоҷикистон ҳам ба курсиҳояшон хайру хуш карданд. Аз ҷумла Ҷило Гулназарзода ректори Донишкадаи давлатии забонҳои Тоҷикистон ба номи Сотим Улуғзода таъин шудааст. То таъини хонум Ҷило ин вазифа дар ихтиёри Маҳмадулло Раҷабзода буд.
Ҷило (Жило) Гулназарзода, доктори улуми филологӣ то расидан ба ин мақом мудири кафедраи типология ва таърихи забони ДМТ ва котиби илмии Шӯрои дифоъи рисолаҳои илмии бахши забоншиносии ҳамин донишгоҳ буд.
Ректори Донишгоҳи давлатии Хоруғ Шермамад Ҷонмамадов ба далели расидан ба синни бознишастагӣ низ озод ва ба ҷойи ӯ Гулзорхон Юсуфзода ректор шудааст. Гулзорхон Юсуфзода доктори илмҳои физикаву математика аст, ки соли 2017 узви вобаста ё аъзо-корреспонденти Академияи миллии илмҳои Тоҷикистон интихоб шудааст.
Ҳамчунин ректори Донишкадаи кӯҳию металлургии Тоҷикистон Мухтор Фозилзода ҳам аз мақомаш барканор шудаву ба ҷойи ӯ дар ин мақом Бахтиёр Маҳмадалӣ омадааст. Диловаршоҳ Исозода курсии ректории Донишкадаи энергетикии Тоҷикистонро соҳиб шудааст, ки то ин вақт ин курсӣ дар ихтиёри Хайрулло Назарзода буд.
Диловаршоҳ Исозода то ин вақт сардори Раёсати маорифи вилояти Хатлон ва аз он пештар муовини ректори Донишгоҳи давлатии Данғара буд.
Бахтиёр Маҳмадалӣ ректори нави ин донишкада то ин вақт мудири Коллеҷи кӯҳии ба номи С.Юсуповаи назди Донишкадаи кӯҳию металлургии Тоҷикистон буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
