Дар шаҳри Конибодоми вилояти Суғд ду хонандаи як мактаб, ки зодрӯзи худро дар тарабхона ва манзили истиқоматӣ дар ҳалқаи гурӯҳи ҳамсинфон таҷлил кардааанд, ба нақзи қонуни танзими расму оинҳо айбдор мешаванд.
Бино ба иттилои мақомот, соҳибҷашнҳо хонандагони синфи 11-и мактаби рақами 14-и ин шаҳр буда дар як ҳолати дигар ба ҷузъ таҷлили зодрӯз дар тарабхона бо дастовезе омӯзгори худро аёдат ва ӯро низ бо зодрӯзаш табрик кардаанд.
Мақомоти милитсия аз рӯйи се ҳолат парвандаи ҳуқуқвайронкунии маъмурӣ боз кардааст.
Акбар Шарифӣ, сухангӯйи Раёсати корҳои дохилии вилояти Суғд дар суҳбат ба “Азия-Плюс” гуфт, дар ҳолати аввал як хонандаи синфи 11-и мактаби рақами 14-и Конибодом бо даъвати 10 нафар ҳамсинфи худ ва оростани дастархон дар қаҳвахонаи “Латифӣ”-и ин шаҳр зодрӯзи худро таҷлил кардааст. Ба ҷузъ таҷлили зодрӯз дар қаҳвахона ҳамзамон ин гурӯҳи хонандагон аз зодрӯзи омӯзгори худ огаҳ шуда бо дастовез табрикоти дастаҷамъона кардаанд. Манбаъ мегӯяд, ин омӯзгор аз фанни забони англисӣ дар мактаби рақами 14-и шаҳри Конибодом дарс мегӯяд. Ва гурӯҳи хонандагон ӯро аёдат карда бо тӯҳфае ба ифтихори 60-солагияш табрик кардаанд, ки ин низ хилофи талаботи қонун мебошад.
“Мақомоти милитсия замоне аз ин ҳуқуқвайронкунӣ огаҳӣ пайдо кард, ки сабти видеоии чорабиниро наврасон паҳн кардаанд”,-гуфт, Акбар Шарифӣ
Инчунин манбаъ мегӯяд, боз як ҳолати таҷлили зодрӯзи хонандаи синфи 11-и ҳамин мактаби шаҳри Конибодомро ошкор карданд, ки дар манзили худ 15 ҳамсинфашро даъват карда зиёфат додааст. Соҳибҷашнҳо яке писар ва дуюми духтар будаанд.
Мақомоти милитсия хонандагонро дар нақзи моддаи 8-и қонун “Дар бораи танзими анъана ва ҷашну маросимҳо” муттаҳам бар асоси моддаи 481-и Кодекси ҳуқуқвайронкунии маъмурӣ мавод тартиб додааст.
Ин банди қонун барои риоя накардани тартиби муҳарраркардаи ин қонун ба шахсони воқеӣ ба андозаи аз 100 то 120 нишондиҳанда ва ба шахсони мансабдор аз 250 то 370 ва ба шахсони ҳуқуқӣ аз 500 то 520 нишондиҳанда барои ҳисобҳо ҷарима муқаррар кардааст.
Бино ба муқаррароти қонуни танзими расму оинҳо ҷашни зодрӯз дар Тоҷикистон ба таври ихтиёрӣ танҳо дар доираи оила сурат мегирад.
Қаблан Бахтиёр Оқилзода, раиси додгоҳи Суғд рӯзи 16-уми феврал дар нишасти хабарӣ гуфта буд, давоми соли 2021 дар шимолии Тоҷикистон 222 адад парвандаҳои вайрон кардани талаботи қонун “Дар борраи танзими анъана ва ҷашну маросимҳо”-ро баррасӣ кардаанд. Вай гуфт аз рӯйи ин парвандаҳо нисбати 203 нафар ҷазои ҷарима ба маблағи 1 млн 213 ҳазору 930 сомонӣ таъин кардаанд.
Раиси додгоҳи Суғд аз зиёд шудани парвандаҳои марбут ба вайрон кардани талаботи қонуни танзими расму оин дар соли гузашта нигарони карда гуфт, соли 2020 дар вилоят ҳамагӣ 188 парвандаро баррасӣ карда буданд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
