Олимҷон Салимзода, вакил ва раиси пешини Кумитаи равобити байналмилалӣ ва кор бо иттиҳодияҳои ҷамъиятии порлумони Тоҷикистон (2009-2020) барои саҳми муассир дар тавсеа ва таҳкими муносиботи Тоҷикистону Ҷопон бо нишони “Тулӯъи хуршед”- и Императори Ҷопон сарфароз гардидааст.
Гуфта мешавад, ки Салимзода дуввумин шаҳрванди Тоҷикистон аст, ки бо ин нишони ифтихории Ҷопон сазовор дониста мешавад. Се сол пеш Талбак Назаров, вазири собиқи корҳои хориҷии Тоҷикистон нишони “Тулӯъи хуршед” (дараҷаи 1)-ро ба худ ихтисос дода буд.
Сафорати Ҷопон дар Тоҷикистон мегӯяд, маросими супоридани мукофот шоми 15-уми март дар сафорати Ҷопон бо иштироки Тошихиро Аики, сафири Фавқулода ва Мухтори Ҷопон дар Тоҷикистон, Олимҷон Салимзода ва дигар шасхсони расмӣ сурат гирифт.
– Олим Салимзода дар тӯли зиёда аз даҳ сол ҳамчун раиси Гурӯҳи дӯстии байнипарлумонии Ҷопон ва Тоҷикистон ва раиси Кумитаи корҳои байналмилалӣ, иттиҳодияҳои ҷамъиятӣ ва иттилооти Маҷлиси намояндагони Маҷлиси Олии Ҷумҳурии Тоҷикистон буданашон саҳми бузурге барои таҳкими муносибатҳои дуҷониба ва рушди табодули байнипарлумонии Ҷопон ва Ҷумҳурии Тоҷикистон гузоштааст, -менависад сафорати Ҷопон дар Тоҷикистон.
“Тулуъи хуршед” нахустин нишони миллии Ҷопон аст ва бо қарори Шӯрои давлатии Ҷопон 10 апрели соли 1875 таъсис ёфтааст. Бо қарори Ҳукумати Ҷопон ин нишон ба афроде дар дохил ва хориҷи Ҷопон тақдим мешавад Дар канори ҷопониҳо шаҳрвандони хориҷӣ низ метавонанд бо ин нишон сарфароз бишаванд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
