Аз 15 то19 октябр дар Душанбе ба ифтихори Рӯзи кинои тоҷик бо дастгирии президенти ҷумҳурӣ Эмомалӣ Раҳмон Синамоҷашнвораи якуми байналмилалии Душанбе «Тоҷи Сомон» доир мегардад. Айни замон давраи интихоби филмҳо барои ҷашнвора ҷараён дорад. Дар ин бора МД “Тоҷикфилм” дар саҳифааш дар Facebook хабар медиҳад.
Синамоҷашнвора таҳти шиори «Таърихи рушди тоҷикон» баргузор мешавад. Ҳадафи баргузории ҷашнвора дастгирии ҷавонони эҷодкор, табодули таҷриба, такмили маҳорати филмбардорони ҷавон, муаррифии филмҳои ватанӣ ва хориҷӣ ба дӯстдорони синамо, таҳияи лоиҳаҳои муштарак, муаррифии самтҳои сайёҳӣ, тарғиби дастовардҳои даврони истиқлолият, таҳким ва тавсеаи робитаҳои байналмилалӣ дар киноиндустрия дар доираи «Барномаи рушди синамои Ҷумҳурии Тоҷикистон барои солҳои 2023-2027» унвон мешавад.
Ба ҳайати Комиссияи интихоби филмҳо Маҳмадсаид Шоҳиён-директори МД «Тоҷикфилм», Ғайбуллозода Толиб-муовини якуми директори МД «Тоҷикфилм», Сӯфизода Шодимуҳаммад – директори китобхонаи ба номи Индра Гандии АМИТ, Заур Дахте – наворбардор, Тилло Некқадамов – киношинос, Зоҳир Сафиуллоҳ – киношинос, Маҳмадулло Табарӣ – санъатшинос, Абдурофеъ Рабизода – филмноманавис, Назар Назаров – сармуҳаррири МД «Тоҷикфилм» шомил шудаанд.
Синамогарони маъруфи кишварҳои ҷаҳон ба сифати меҳмонони фахрӣ дар ҷашнвора иштирок мекунанд.
“Филмҳо дар ду озмун – озмуни филмҳои ҳунарии пурра ва озмуни филмҳои ҳунарии кӯтоҳ иштирок ва рақобат хоҳанд кард. Қабули филмҳо аз кишварҳои Аврупо, Осиё ва кишварҳои узви Иттиҳоди Давлатҳои Мустақил”, – омадааст дар хабар.
Гуфта мешавад, интихоби филмҳо аз 22-юми август шурӯъ гардида, то ба имрӯз зиёда аз 25 филм аз кишварҳои Эрон, Беларус, Маҷористон, Узбекистон, Покистон, Туркманистон, Қазоқистон, Россия, Арманистон, Ҳиндустон ва Чин мавриди баррасӣ ва тамошо қарор гирифта, филмҳои мувофиқ барои иштирок ва рақобат дар озмунҳои Синамоҷашнвораи якуми байналмилалии Душанбе «Тоҷи Сомон» тавсия дода шуданд.
Ба ҷуз озмунҳо, дар доираи синамоҷашнвора баргузории ҷаласаи Шӯрои директорони киностудияҳо, шиносоӣ бо лоиҳаҳо дар соҳаи кино (филмҳои тасвирӣ, ҳунарӣ ва мустанад), вохӯрӣ бо иштироки намояндагони синамои кишварҳои хориҷи дур ва наздик, нишастҳои матбуотӣ, Рӯзҳои кинои давлатҳои хориҷӣ, намоишгоҳи аксҳои Душанбе, инчунин машғулиятҳои “устод ва шогирд” ба нақша гирифта шудааст.
Бо регламенти синамоҷашнвора дар суроғаи зерин шинос шудан мумкин аст.
