Дар доираи Ҳамкории байналмилалӣ аз ҷониби Кумитаи ҳолатҳои фавқулодда бо дастгирии шарикони байналмилалӣ аз рӯзҳои аввали офати табиӣ ба аҳолии осебдида бо маводи ғизоӣ ва ғайриғизоӣ мунтазам кумак расонида мешавад.
Тавре ки Кумитаи ҳолатҳои фавқулодаи ҷумҳурӣ хабар медиҳад, охири ҳафтаи гузашта Кумита дар ҳамдастӣ бо шарикони байнулмилалӣ ва супориши президент ба 446 хонаводаи ҷамоатҳои деҳоти шаҳри Ваҳдат ва 90 хонаводаи ҷамоатҳои деҳоти ноҳияи Рӯдакӣ, ки аз сели рӯзҳои 27-28 август осеб диданд, кумак карданд.
“Бо шарофати вокуниши фаврӣ ва ташкили возеҳи ҳамкориҳо бо дастгирии Агентии Оғохон оид ба Муҳити зист, Барномаи ҷаҳонии озуқаи СММ дар Тоҷикистон, Хазинаи кӯдакони СММ дар кишвари мо ва созмони ҷамъиятии «Дили хайрхох» ба аҳолии шаҳру навоҳии ҷумҳурӣ, ки аз офати табиӣ зарар дидаанд, саривақт кӯмак расонида шуд”, – омадааст дар хабари Кумита.
Бино ба маълумоти КҲФ, ин кумак аз маводи ғизоӣ, маводи ниёзи аввалия, кӯрпаву бистари хоб, бастаҳои беҳдоштӣ, зарфҳои нигоҳдории об, лавҳаҳои поксозии оби ошомиданӣ иборат буда, бо ёрии техникаи махсуси КҲФ ба ҷамоати деҳоти шаҳрҳои Ваҳдат ва ноҳияи Рӯдакӣ расонида шуд.
Гуфта мешавад, айни замон корҳо ҷиҳати рафъи оқибатҳои офати табиӣ ва расонидани кӯмаки минбаъда ба дигар деҳоту ҷамоатҳои зарардида таҳти назорати Кумитаи ҳолатҳои фавқулода идома доранд.
Ёдрас мекунем, ки боришоти шадиди рӯзҳои 27-28 август дар Тоҷикистон ба офатҳои табиӣ боис гардида, бар асари ин ҳодисаҳо 21 нафар ҳалок шуданд.
