Кумитаи дифоъ аз журналистон (CPJ) эълон намуд, ки аз оғози даргириҳо миёни Ҳамос ва Исроил дар Навори Ғазза 31 хабарнигор кушта шудаанд.
Ба иттилои ин кумита, аз миёни кушташудаҳо 26 рӯзноманигори фаластинӣ, чаҳор рӯзноманигори исроилӣ ва як рӯзноманигори лубнонӣ мебошанд.
Ин созмон навишта, ки дар ин давра 8 хабарнигор захмӣ ва 9 тани дигар бедарак ва ё боздошт шудаанд.
Ҳамзамон кумитаи мазкур изҳор намудааст, ки дар бораи боздошт, таҳдид ва ғайб задани дигар хабарнигорон таҳқиқот идома дорад.
Дар ин низоъ бархе аз хонаводаҳои хабарнигорон низ кушта шудаанд.
Қаблан шабакаи телевизионии “Ал – Ҷазира” аз кушта шудани аъзои хонаводаи як хабарнигори худ дар ин даргирӣ гузориш дода буд.
Вобаста ба ин Федератсияи байналмилалии рӯзноманигорон аз ҷонибҳои даргир хостааст, ки хушунатҳоро коҳиш диҳанд ва аз ЮНЕСКО хостааст, ки барои ҳифзи рӯзноманигорон тамоми чораҳоро биандешанд.
Гуфтан ба маврид аст, ки миёни Исроил ва Ҳамос 7-уми октябр даргирӣ оғоз ёфт. Низоъ пас аз ҳамлаи гуруҳи Ҳамос ба Исроил ва куштани 1400 нафар ва ба асорат гирифтани беш аз 200 каси дигар сар шуд.
Дар пайи ин Исроил эълони ҷанг кард ва Навори Ғазза, макони гуруҳи Ҳамосро муҳисира ва мушакборон намуд. Инак бо гузашти се ҳафта аз оғози низоъ беш аз 8000 фаластинӣ, аз ҷумла наздики 3 ҳазор кӯдак кушта шуданд.
