Ширкати “Asian Express Airline” бо хоҳиши муштариёнаш хатсайри Душанбе – Балҷувон боз кардааст. Дар ин бора як масъули ин ширкат ба “Азия-Плюс” иттилоъ дод.
Ба гуфтаи ӯ, дар ин масир ду рӯз инҷониб, рӯзе як маротиба автобусҳо фаъолият доранд.
“Ин хатсайрро бо талаби зиёди муштариён боз кардем ва ҳар рӯз танҳо як автобус ба ин роҳ равона мешавад. Агар дар оянда теъдоди истифодабарандагон зиёд шавад, шумораи автобусҳоро низ бештар мекунем”, – гуфт ҳамсӯҳбати мо.
Манбаъ афзуд, “нархи ин хатсайр 40 сомонӣ аст, ҳар субҳ соати 9:00 аз тераминали “Asian Express”-и Душанбе ба сӯи Балҷувон ҳаракат мекунад ва пас аз нисфирӯзӣ аз он ҷо ба пойтахт бармегардад”.
Ёдовар мешавем, ки ширкати “Asian Express Airline” соли 2013 ифтитоҳ шудааст ва ин ширкат ҳоло қариб ба саросари Тоҷикистон хатсайр дорад.
