Шоми рӯзи 30-юми май Душанбе воқеан тобистона буд. Дар ин рӯз на танҳо ҳаво гарм, ҳамчунин ҳазорон нафар хушу болидарӯҳ буданд, зеро дар “Боғи Ирам”, дар ҷашнвора анъанавии “Салом, Тобистон!”, ки аз ҷониби Гурӯҳи расонаҳои “Азия-Плюс” роҳандозӣ гардид, иштирок доштанд.
Имсол ҷашнвора ҳудуди 7 ҳазор меҳмонро гирдиҳам овард: кӯдакону калонсолон, шунавандагони содиқи Радиои “Азия-Плюс” ва шахсоне, ки бори нахуст ба ин чорабинӣ омадаанд. Ҳамчунин афродеро, ки аллакай чанд сол боз ҳамроҳи мо оғози фасли тобистонро ҷашн мегиранд.
Қитъаи сабз, мусиқӣ ва хандаи кӯдакон
Аз соати 16:00 ҳудуди “Боғи Ирам” ба ҷазираи рангоранги тобистона табдил ёфт. Ин ҷо гӯшае барои хӯрок, минтақаҳои бозӣ ва макони аксбардорӣ таҳия шуда буд. Аз тамоми гӯшаву канор, дар пасманзари табиати шукуфо аз гулу сабза садои мусиқиву хандаи кӯдакон ба гӯш мерасид.
Ровиёни шинохта Лола Абдуназарова ва Меҳрубон Зокирӣ ва ҳамчунин мудири барномаҳои радиои “Азия-Плюс” Субҳон Ҷалилов меҳмононро шодбош гуфтанд. Ӯ дар бораи то кадом андоза муҳим будани чунин вохӯриҳо изҳори назар кард.
Дар идома намояндаи шарики кулли ҷашнвора – ширкати “Оби Зулол” ҳам ба ӯ ҳамроҳ шуд.
Ҳозирин ҳунарнамоии гурӯҳи рақсии “Жасмин”-ро, ки ду навъи рақси кӯдакона намоиш доданд, хеле хуб истиқбол гирифтанд. Баъдан, аз ҷониби ровиён озмунҳои шавқовар бо ҷоизаҳо аз шарикони ҷашнвора шурӯъ шуданд. Яке аз лаҳзаҳои ҷолиб намоиш аз ҷониби ҳунармандони сирк шуд, ки кӯдаконро ба ваҷд овард.
Ҳамзамон, бо барномаи асосӣ дар қитъаҳои гуногуни ҷашнвора дигар чорабиниҳо ҳам ҷараён доштанд. Кӯдакон бо қаҳрамонҳои дӯстдоштаи фимлҳои тасвирӣ рақсида, ба расмкашӣ машғул буданд ва чеҳраи худро бо рангҳои гуногун оро меоданд.
Дар майдони футбол мусобиқаи хурд доир гардида, бо истифода аз “микрофони боз”-и “Азия-Плюс” хоҳишмандон ба волидонашон самимона изҳори миннатдорӣ карданд.
Меҳмонон дар ҳамаи қитъаҳои ҷашнвора таронаҳо сароиданду рақсиданд, шоҳмотбозӣ карданд ва ҳатто ба йога ҳам машғул шуданд.
Ҷашнворае, ки ба анъана табдил ёфт
“Салом тобистон!”-ро бисёриҳо аллакай ҳамчун рамзи оғози фасли тобистон ва анъанаи нек мешуморанд. Ин на танҳо як ҷашн, балки имконест барои вохӯрӣ, ёдоварии муҳим будани гузаронидани вақт бо оилаву дӯстон ва ҳамроҳ истироҳату фароғат кардан мебошад.
Шомгоҳон, ҳангоми тарк кардани “Боғи Ирам” меҳмонон на танҳо ҷоизаву мукофот ва аксҳо, балки муҳимтар аз ҳама — рӯҳияи хуберо барои тамоми фасли тобистон бо худ бурданд.
Гурӯҳи расонаҳои “Азия-Плюс” ба ҳамаи ширкатҳое, ки ба ташкили ин ҷашн ба мо кумаки худро дареғ надоштанд, изҳори миннатдорӣ мекунад. Азз ҷумла ба шарики кулл "Оби Зулол", шарики расмӣ – ширкати "Линдавит", мактабҳои кӯдаконаи "Акварелька", "Арт Дошан" ва мактаби робототехникаи "ROBX", студияи "YogaHouse", Маркази фароғати кӯдаконаи "Мадагаскар". Ҳамчунин, "Пайкар", "Додо Пицца", "Форам", "Чокоберри" ва МД “Мактаби махсуси варзишии захираҳои олимпии №7 оид ба шоҳмот ва шашка”-и шаҳри Душанбе дар сафи дӯстони мо қарор доштанд.
