Сатҳи таваррум дар Тоҷикистон дар зарфи 6 моҳи соли ҷорӣ 1,8%-ро ташкил дод. Дар ин бора Агентии омори ҷумҳурӣ хабар медиҳад.
Аз ҷумла маҳуслоти хӯрокворӣ ба андозаи 2,9%, хидматрасониҳои пулакӣ ба аҳолӣ – 3,4% гарон шуда, нархҳо ба маҳсулоти ғайриозуқа дар сатҳи аввали сол боқӣ мондаанд.
Дар байни маҳсулоти хӯрокворӣ нархҳо ба сабзавот (26,7%), равған ва чарбу (5,8%), маҳсулоти гӯштӣ (4,8%), мева (8,0%) ва нӯшокиҳои ғайримашруботӣ (0,9%) ба таври назаррас боло рафтанд. Дар баробари ин нархҳо ба биринҷ (1,4%), шакар (2,5%), тухм (4,4%) ва орд (8,8%) поин рафтаанд.
Миёни маҳсулоти ғайриозуқа поинравии нарх ба маводи сӯзишворӣ ва равғанҳои молиданӣ ба андозаи 12,0%, аз ҷумла бензин – 7,7%, сӯзишвории дизелӣ – 8,5% ва гази моеъ – 19,0% ба қайд гирифта шуданд.
Нарху таърифаҳо (тарифҳо) ба хидматрасонии пулакӣ ба аҳолӣ ба андозаи 4,7% асосан аз ҳисоби хидматрасониҳо дар соҳаи хӯроки умумӣ ва хидматрасониҳои маишӣ – 1,7% зиёд шуданд.
Мақомоти Тоҷикистон аллакай соли чорум дар бораи сатҳи рекордии пасти таваррум маълумот медиҳанд. Тибқи маълумоти Агентии омор, дар соли 2022 нарху таърифаҳо ба андозаи 4,2%, соли 2023 – 3,8% ва соли 2024 – 3,6% боло рафта буданд. То ин дам сатҳи пасттарини таваррум давоми тамоми солҳои соҳибистқлолӣ танҳо дар соли 2013 ба андозаи 3,7% ба қайд гирифта шуда буд.
Сатҳи ҳадафноки Бонки миллии кишвар, ки ба нигаҳдории сатҳи устувори нархҳои истеъмолӣ машғул аст, дар ҳудуди 5,0% (±2 банди фоизӣ) боқӣ мемонад.
