Сабрина Бобоева, машшота (ороишгари ҳусн) аз Тоҷикистон дар мусобиқоти байналмилалии ҳунари машшотагӣ, ки аз 20 то 23-юми ноябр дар шаҳри Сочии Русия баргузор шуд, сазовори ҷои дуввум ва соҳиби медали нуқра гардид. Дар ин мусобиқа зиёда аз 3 ҳазор нафар аз 45 кишвар ширкат карданд.
Ӯ дар ин мусобиқа маҳорати баланди ҳунармандӣ нишон дода, дар муқоис аба дигар иштирокчиён малакаи хубтар нишон додааст.
“Барои ман ин рӯйдоди хеле муҳим буда, ифтихор дорам, ки Тоҷикистонро дар чунин сатҳи баланд муаррифӣ кардам. Медали нуқра дар сатҳи ҷаҳонӣ на танҳо пирӯзист, ҳамчунин, дастовард барои кишвар ҳам ҳаст. Ин пирӯзиҳо тасодуфӣ нестанд, натиҷаи эътимод, азми қавӣ ва муҳаббат ба касби худ мебошанд”, -навиштааст Сабрина Бобоева дар саҳифаи худ "Instagram".
Номбурда мутмаин аст, ки чунин дастовардҳо ба дигарон рӯҳу илҳом бахшида, барои машшоттаҳо аз Тоҷикистон уфуқҳо нав боз мекунанд.
Аз Панҷакент ба Сочи. Таърихи комёбии Сабрина Бобоева
Сабрина Бобоева дар шаҳри Панҷакент ба дунё омадаву ба воя расидааст. Вақте ки ӯ 27-сола буд, аллакай худро ҳамчун як машшотаи бомаҳорати дорои таҷрибаи байнулмилалӣ муаррифӣ кард.
Дар тӯли панҷ соли кор, ӯ аз як ҳунарманди ҷавон то ба як устоди сатҳи байнулмилалӣ ва академики ҳунари машшотагӣ расид.
Роҳнамо ва идеали ӯ Георгий Кот мебошад, ки нерӯ ва истеъдоди ӯ Сабринаро ҳамеша барои беҳтар гардидан ва расидан ба қуллаҳои нав ташвиқ мекард.
Ӯ аз корҳои ситораҳои ҷаҳонии ҳунари машшотагӣ илҳом гирифта, орзу мекард, ки беҳтарин дар ҷаҳон шуда, парчами Тоҷикистонро парафшон созад ва Академияи ҳунари машшотагиро дар кишвараш таъсис диҳад.
“Орзу дорам, ки устодони ин ҳунар аз тамоми ҷаҳон ба Тоҷикистон омада, на танҳо малакаҳои худро беҳтар кунанд, балки бо фарҳанг, табиат ва самимияти мардуми мо аз наздик шинос шаванд”, – гуфт ӯ зимни суҳбат бо "Азия-Плюс".
Орзуи Сабрина Бобоева
Яке аз орзуҳои Сабрина Бобоева иштирок дар Бозиҳои олимпӣ оид ба ҳунари машшотагӣ дар соли 2027 мебошад. Ӯ ният дорад, ки ҳунари машшотагии Тоҷикистонро дар арсаи ҷаҳонӣ муаррифӣ ва сатҳи баланди касбиятро нишон диҳад.
Ӯ орзу дорад, ки мураббӣ шуда, тими мунтахаби пурқувати Тоҷикистонро омода созад ва ба машшотагони оянда барои ноил гардидан ба дастовардҳои назаррас рӯҳу илҳом бахшад.
Вай бовар дорад, ки дастовардҳои ӯ танҳо оғози роҳи бузург аст. Роҳе, ки ӯ тай кард, пур аз заҳмату илҳом ва фидокорӣ тай кард.
Сабрина Бобоева моҳи марти соли 2025 дар мусобиқоти ҳунари машшотагӣ дар Ӯзбекистон ҷои якумро касб кард ва ва Шоҳҷоиза гирифт. Ҳамчунин, дар Академияи Георгий Кот, устоде, ки саҳмаш дар ҳунари машшотагӣ беназир аст, мақоми аввалро касб кард.
“Ин дастовардҳо қадамҳои муҳим дар касби ман буда, бовар дорам, ки оянда маро пирӯзиҳои бештаре аз ин интизоранд”, – мегӯяд Сабрина.
