Иқбол Солиев, табибе аз Ӯзбекистон, ки гӯё беморонро бо ламсу молиш “табобат” мекард, 10 шабонарӯз ҳабс шудааст. Дар ин бора додгоҳи вилояти Фарғона хабар додааст. Муштариёни ӯ аз Тоҷикистон ҳам буданд.
Ин табиби 54-сола дар Ӯзбекистон барои бе иҷозатнома ба фаъолияти тиббӣ машғул гардидан ба ҳабс гирифта шудааст. Ӯ рӯзи 17-уми декабр бозошт ва ба ҳабс гирифта шуд.
Баҳси дуохониаву "ҷинбарорӣ" ва ё ба истилоҳи дигар ба “табобати халқӣ” машғул шудани ин табиб ҳанӯз аз соли гузашта пурбаҳс гардида буд. Дар наворҳое, ки худаш аз раванди "табобат" нашр кардааст, дида мешавад, ки муштариёни ӯ аксаран занҳо буда, Иқбол Солиев аксран онҳоро бо ламс ва молиш ба гуфтаи худаш "табобат" мекунад.
Аз ҷумла, дар як навор, ки зоҳиран муштариёнаш аз Тоҷикистонанд, дида мешавад, ки ӯ аз зан нахуст дардашро мепурсад ва баъд бо роҳи ламс кардан аз ӯ мепурсад, ки “худро сабук ҳис мекунад ё не”. Зан посух медиҳад, ки “сабук ва нағз шудааст”.
Дар наворҳои дигаре низ мушоҳида мешавад, ки сокинони кишвар ба назди ин “табиб” мераванд ва ӯ тариқи ламс онҳо “даво” мебахшад. Муштариёни ӯ бошад, худро сокини шаҳри Душанбеи Тоҷикистон мегӯяд.
Дар ин маводи “Азия-Плюс” дар бораи истифода аз хадамоти фолбинҳои кишварҳои ҳамсоя, аз ҷумла Иқбол Солиев аз сӯи сокинони кишвар дар пайи шадид шудани муҷозот дар дохили кишвар маълумоти бештар гиред: Баъди шадид шудани муҷозот, сокинони кишвар ба хидмати фолбину ҷодугарони ҳамсоякишварҳо рӯ овардаанд.
ИЗОБРАЖЕНИЕ Занон дар навбати фолбин дар яке аз деҳаҳои кишвар
Таваҷҷуҳ ба "фолбин"-у "ҷодугар"-ҳои кишварҳои ҳамсоя замоне бештар шуд, ки дар Тоҷикистон “шикор”-и онҳо оғоз гардид ва ҳамин тариқ, на танҳо худи фолбинҳо, ҳамчунин онҳое, ки ба назди сеҳрдонҳо мерафтанд, муҷозот таъин гардид.
Ахиран, Маҷлиси миллӣ, палати болоии парлумон тарҳи ин қонунро қабул кард, ки минбаъд нисбати онҳое, ки ба назди фолбину ҷодугар рафта, аз хидмати онҳо истифода мекунанд, аз 3750 то 4500 сомонӣ татбиқ мешавад. Ҳамакнун баъди имзои раисҷумҳур ва нашр дар расонаҳо ба ҳукми амал медарояд.
Бояд гуфт, як сол охир мақомоти Тоҷикистон мубориза бо фолбину ҷодугарро пурзур кардаанд. Танҳо дар 6 моҳи соли ҷорӣ мақомот беш аз 495 ҳолати машғул шудан ба сеҳру ҷоду ва фолбиниро ошкор кардаанд.
Соли гузашта ҷазо барои машғул шудан ба фолбинӣ ва ҷодугарӣ сахттар шуд. Парлумони кишвар ба Кодекси ҳуқуқвайронкунии маъмурӣ тағйирот ворид кард ва андозаи ҷарима аз 80 то 100 нишондиҳанда ва ҳабси маъмурӣ аз 10 то 15 шабонарӯз таъин гардид. Пештар ҷарима аз 60 то 100 нишондиҳандаро ташкил мекард.
Ҳамчунин, бар асоси тағйироте, ки ба моддаи 240 Кодекси ҷиноятии Тоҷикистон ворид гардид, барои машғул шудан ба сеҳру ҷоду ва фолбинӣ (агар чунин кирдор давоми сол баъди татбиқи ҷазои маъмурӣ содир шуда бошад) аз 1,500 то 2 ҳазор нишондиҳанда барои ҳисобҳо ё аз як то ду соли зиндон пешбинӣ мекунад.
