Дар доираи баргузории Рӯзҳои фарҳангии Тоҷикистон дар Покистон, ки рӯзи 18-уми декабр оғоз шуд ва то 24-уми декабр идома мекунад, бо ширкати ҳунармандону санъаткорон ва доираҳои фарҳангиву адабии тоҷик дар ин кишвар як қатор чорабиниҳои фарҳангӣ ва илмӣ баргузор гардид. Дар маросими кушодашави ин рӯзҳо, Осиф Алӣ Зардорӣ, президенти Покистон ҳам ширкат дошт.
Маросими расмии кушодашавии Рӯзҳои фарҳанги Тоҷикистон дар Покистон шоми 18-уми декабр дар Шӯрои санъати миллии Покистон баргузор шуд. Осиф Алӣ Зардорӣ дар ин ҳамоиш дар робита ба муносибатҳои гуногунҷанбаи Тоҷикистону Покистон суҳбат кардааст.
ИЗОБРАЖЕНИЕ Осиф Алӣ Зардорӣ аз тарафи рост якум
Баъди ифтитоҳи расмии чорабинӣ, бо ширкати раисҷумҳури Покистон барномаи консертӣ бо ширкати ҳунарпешаҳои Тоҷикистон баргузор шудааст. Барномаи консертӣ бо иштироки ҳунармандони шинохтаи кишвар, аз ҷумла Нозия ва Муҳаммадрофе Кароматуллоҳо, Фотима Машрабова, ансамбли созҳои миллӣ, гурӯҳҳои рақсии “Лола” ва “Парасту” доир гардидааст.
Ба иттилои Вазорати фарҳанги Тоҷикистон, қабл аз оғози барномаи консертӣ дар 3 толори барҳавои ин макон намунаҳои ҳунарҳои мардумӣ, санои дастӣ, маҳсулоти гуногуни нонӣ, мева, оши палав ва намоши мусаввараву аксҳо ороиш ёфта буд.
Қабл аз ин, дар шаҳри Исломобод мулоқоти Матлубахон Сатториён, вазири фарҳанги Тоҷикистон бо Аврангзеб Хан Хичи, вазири фарҳанги Покистон сурат гирифт.
Манбаъ мегӯяд, зимни вохӯрӣ ҷонибҳо бо мақсади рушди ҳамкориҳои Тоҷикистону Покистон дар соҳаи фарҳангу санъат ҳавасамандии хешро ҷиҳати ба роҳ мондани ҳамкориҳои мутақобилан судманд байни муассисаҳои таълимӣ, инчунин омода намудани мутахассисони касбӣ ва мубодилаи таҷриба изҳори назар кардаанд.
ИЗОБРАЖЕНИЕ Матлубахон Сатториён аз рост якум бо Аврангзеб Хан Хичи аз чап якум
Ба ғайр аз ин, дар ҳошияи баргузории ин рӯзҳо, 19-уми декабри соли 2025 мулоқоти Матлубахон Сатториён бо Шаҳбоз Шариф, сарвазири Покистон баргузор гардид.
“Сарвазири Покистон зимни мулоқот аз баргузории Рӯзҳои фарҳанги Тоҷикистон изҳори хушнудӣ намуда, таъкид кард, ки ин иқдом аз сатҳи баланди муносибатҳои Покистон бо кишвари дӯст Тоҷикистон шаҳодат медиҳад ва бори нахуст доир гардидани ин чорабинии муҳими фарҳангӣ ҳамчун пули иртиботӣ барои тақвияти ҳамкориҳои минбаъдаи тоҷикистону Покистон заминаи устувор хоҳад гузошт”, – менависад Вазорати фарҳанг.
ИЗОБРАЖЕНИЕ Матлубахон Сатториён бо Шаҳбоз Шариф
Ҳамчунин, дар ин рӯз, дар Маркази мероси фарҳангии халқии “Lok Virsa”-и намоиши молу маҳсулоти тоҷик ва санъати миллӣ оғоз гардид, ки дар он вазирони фарҳанги ду кишвар, корпусҳои дипломатии муқими Исломобод ва ҳунармандону фарҳангиёни ду кишвар ширкат карданд.
Ин ниҳод мегӯяд, дар доираи ин рӯзҳо, ҳамчунин, 19-уми декабр Матлубахон Сатториён бо Аттоулло Тарар, вазири иттилоот ва телевизиони Покистон доир гардид.
Дар ин мулоқот масоили гуногуни ҳамкориҳо аз ҷумла таъсиси гурӯҳи корӣ миёни вазоратҳо барои танзими ҳамкориҳои фарҳангӣ дар оянда, ҳамчунин омодасозии кадрҳои соҳа дар донишкадаҳои ду кишвар, дар самти филмофарӣ, театр, китобхона, идомаи баргузории Рӯзҳои фарҳанг дар ду кишвар ва ғайра мавриди баррасии ҷонибҳо қарор гирифтанд.
ИЗОБРАЖЕНИЕ Матлубахон Сатториён бо Аттоулло Тарар
Ҳамчунин, дар ин рӯз ҳайъати расмӣ ва ҳунарии Тоҷикистон аз макони ҳунарҳои мардумии Покистон ва Осорхонаи этнологии ин кишвар боздид карданд.
Дар ҳошияи ин рӯзҳо, 20-уми декабр дар Исломобод форуми байналмилалии "Покистону Тоҷикистон ду қолабу як ҷон" баргузор шуд, ки дар он аҳли илму адаб олимон, шоирону нависандагони Тоҷикистону Покистон иштирок ва суханронӣ карданд.
Ҳумайро Шаҳбоз, мудири бахши тарҷумаи забонҳои муосири Донишгоҳи миллии Покистон зимни сухнаронӣ дар ин форум гуфтааст, ки “ҳамоиши мазкур қадами муассиру таконбахш дар таҳкими равобити фарҳангиву адабии ду миллати ба ҳам дӯст мебошад”.
Муборакшоҳ Шамсов, номзади илмҳоии фалсафаи Акадамияи миллии илмҳои Тоҷикистон дар мавзуи "Баҳовуддини Нақшбанд- пайвагдгари мероси фарҳангии орифони Осиёи марказӣ ва ҷанубӣ", Наҷмиддин Салоҳиддинзода, олими дигари тоҷик дар мавзуи "Файз Аҳмади Файз ва Мирзо Турсунзода" ва Замира Ғаффорӣ, профессори Донишгоҳи давлатии Хуҷанд ба номи Бобоҷон Ғафуров дар мавзӯи "Абдуллоҷон Ғаффоров ва ташаккули мактаби иқболшиносии тоҷикӣ" маъруза карда, роҷеъ ба равобити аҳли тасаввуфи ду миллат, решаҳои куҳани дарахти дӯстии Тоҷикистону Покистон ва саҳми олимони тоҷик дар муаррифӣ ва шинохти Иқбол дар Тоҷикистон ҳарф задаанд.
Ҳамчунин олимони покистонӣ, Робия Каёнӣ, Амбар Ясмин, Васим Раҷа ва дигарон роҷеъ ба тасаввуф ва эҷодиёти Муҳаммад Иқболи Лоҳурӣ ва робитаҳои ҳасанаи ду миллат сухан карданд.
Иштирокдорони форум изҳори боварӣ кардаанд, ки минбаъд равобити илмӣ- адабӣ байни Тоҷикистону Покистон густариш хоҳад ёфт.
Шоми ҳамон рӯз, ҳамзамон дар Маркази мероси фарҳангии халқии “Lok Virsa”-и шаҳри Покистон барномаи консертии муштараки ҳунармандони Тоҷикистону Покистон манзури тамошобинон покистонӣ гардид.
