Арзиши тилло дар биржа бори нахуст дар таърих ба зиёда аз 5 ҳазор доллар барои унсияи секарата расида, босуръат гарон мешавад. Соли 2025 нархи ин навъи фулузоти гаронбаҳо беш аз 60% афзуда, рекордҳоро пайваста нав кардад. Дар ин бора ВВС иттилоъ медиҳад.
Болоравии нарх дар пасманзари шиддати ихтилофот миёни ИМА ва кишварҳои аъзои Созмони аҳдномаи атлантикаи шимолӣ (НАТО) атрофи вазъияти марбут ба Гренландия сурат гирифт, ки интизориҳои ташвишовари сармоягузоронро вобаста ба ноустувории молиявӣ ва геополитикӣ ба бор овард.
Сиёсати пешгирифтаи тиҷоратии президенти ИМА Доналд Трамп ба бозорҳо таъсири иловагӣ мерасонад. Рӯзи 24-уми январ ӯ доир ба ҷорисозии боҷҳои воридотии 100-фоиза алайҳи Канада дар ҳолати аз ҷониби ин кишвар имзо шудани созишномаи тиҷоратӣ бо Чин изҳори назар кард.
Тилло дар баробари дигар фулузоти қиматбаҳо аз ҷониби иштирокчиёни бозор маъмулан ҳамчун дороии захиравӣ арзёбӣ мешавад, ки дар давраҳои ноустувории баланд талаботи зиёд дорад.
Арзиши нуқра низ рекорди таърихиро нав карда, пас аз афзоиши тақрибан 150 фоиз дар соли гузашта аз 100 доллар барои як унсия боло рафт.
Таваҷҷуҳ ба фулузоти қиматбаҳо инчунин ба як қатор омилҳои бунёдӣ рабт дорад. Аз ҷумла, сатҳи таварруме, ки ҳамоно аз нишондиҳандаҳои миёна баландтар боқӣ мемонад, заъифшавии доллари ИМА, харидҳои фаъоли тилло аз ҷониби бонкҳои марказии кишварҳои гуногун, ҳамчунин интизориҳои коҳиши меъёрҳои фоизӣ аз ҷониби Низоми федеролии захиравии ИМА дар давоми соли ҷорӣ.
Ба ҷараёни нархҳо низоъҳои байналмилалӣ низ таъсир расонданд, аз ҷумла амалиёти ҷангӣ дар Украина ва Навори Ғазза, ҳамчунин иқдомҳои Вашингтон нисбат ба президенти Венесуэла Николас Мадуро.
Тибқи арзёбиҳои Хадамоти геологии ИМА, ҳаҷми захираҳои зеризаминии ҳанӯз истихроҷнашудаи тилло тақрибан 64 ҳазор тоннаро ташкил медиҳад. Ҳамзамон таҳлилгарон пешгӯӣ мекунанд, ки дар солҳои наздик пешниҳод дар бозори ин металли қиматбаҳо нисбатан устувор боқӣ мемонад.
"Вақте ки шумо соҳиби тилло ҳастед, он ба қарзҳои одамони дигар вобаста нест, мисли вомбрагҳо ё саҳмияҳо, ки даромаднокии онҳо аз натиҷаҳои фаъолияти ширкат вобаста аст. Ин воқеан як василаи хуби гуногунсамтии нигаҳдории даромаду захираҳо дар ҷаҳони хеле номуайян аст", — гуфтааст Николас Фраппелл аз ширкати ABC Refinery.
Соли 2025 барои бозори тилло рекордӣ шуд: ин металл дар пасманзари ҷараёни густардаи воридшавии сармоя ба бахши фулузоти қиматбаҳо, аз соли 1979 инҷониб афзоиши солонаи аз ҳама назаррасро нишон дод.
Нигарониҳо вобаста ба эҳтимоли ҷорӣ шудани маҳдудиятҳои нави тиҷоратӣ аз ҷониби маъмурияти Трамп, ҳамчунин нишонаҳои аз ҳад зиёд болоравии саҳмияҳои ширкатҳои фаъол дар соҳаи зеҳни сунъӣ, изтиробро дар бозорҳои молиявӣ тақвият доданд, ки борҳо боиси нав шудани рекордҳои таърихии нархи тилло гардид.
