Душанбе. 12-уми феврал. ОИ «Азия-Плюс» – Имрӯз дар Душанбе лоиҳаи сохтори Стратегияи коҳиши сатҳи камбизоатӣ дар Тоҷикистон барои солҳои 2010-2012 муаррифӣ гардид. Зимни шарҳи он муовини вазири рушди иқтисод ва савдои ҷумҳурӣ Абдуғаффор Раҳмонов изҳор дошт, ки таҳияи лоиҳа ахири моҳи оянда ба анҷом расида, сипас ҷиҳати баррасӣ ба ҳукумат пешниҳод мегардад.
Дар бораи натиҷаҳои стратегия А.Раҳмонов гуфт, феълан ҳамагӣ 53 дарсади чораҳои зарурии ин санад ба сомон расидаанд. «Агар мушкилоти сохторӣ комилан ҳал мегаштанду саривақт Шӯрои миллии рушд, шӯрои методиву коршиносон таъсис меёфту сохтори мониторинг ва баҳодиҳӣ дар мақомоти марказӣ ва маҳаллии ҳокимияти давлатӣ ташкил мегардид, ин нишондиҳанда метавонист хеле зиёдтар бошад», – гуфт ӯ.
Номбурда зикр кард, ки вазъи бӯҳрони энергетикии зимистони солҳои 2007-2008 низ яке аз иллатҳои дар сатҳи зарурӣ иҷро нагардидани чорабиниҳои ин ҳуҷҷат мебошад. «Ҳамчунин истифодаи ғайриоқилонаи кӯмаки хориҷӣ ва ба эътибор нагирифтани ҷиҳатҳои маблағгузории ин стратегия ҳангоми таҳияи буҷет ҷараёни иҷрои чорабиниҳои пешбинишударо боздоштанд», – афзуд А.Раҳмонов.
