Агентии Туркия оид ба ҳамкорӣ ва ҳамоҳангсозӣ (ТИКА) дар ҳамкорӣ бо созмони ҷамъиятии “Моҳру” барои занони деҳаи Шарораи шаҳри Ҳисор барномаи омӯзиши дӯзандагиро амалӣ кард.
Барномаи мазкур бо иштироки беш аз 10 зани ҷавон сурат гирифта, “ҳадафи он баланд бардоштани малакаҳои касбӣ, ҷалби фаъолона ба раванди истеҳсолот ва таҳкими мавқеи онҳо дар ҳаёти иқтисодӣ мебошад”.
Дар доираи ин барнома, омӯзгорони ботаҷриба ба иштирокчиён давоми 6 моҳ дарсҳои амалии дӯзандагӣ, тарҳрезӣ, буриш ва ороишро тадрис доданд.
Ҳадафи лоиҳа ин аст, ки занон ба шахсони мустақил табдил ёфта, ба иқтисоди оилаи худ саҳм гузоранд. Дар натиҷа, иштирокчиён касби дӯзандагиро аз худ карда, имкони ба даст овардани даромади устуворро пайдо карданд.
Масъулони созмони ҷамъиятии “Моҳрӯ” гуфтанд, ки шогирдон дар оғоз таҷрибаи маҳдуди дӯзандагӣ доштанд, вале дар давоми омӯзиш ба пешравиҳо ноил шуда, дар соҳаҳои дӯхтани либосҳои миллӣ, шим ва либосҳои махсуси корӣ маҳорат пайдо карданд.
Бо мақсади дастгирии онҳо дар роҳандозии тиҷорати шахсӣ, аз ҷониби ТИКА ба ҳамаи хатмкунандагон таҷҳизоти зарурӣ, пеш аз ҳама мошинҳои дӯзандагӣ ва дарзмолҳо тақдим карда шуд.
ТИКА аз соли 1995 инҷониб дар Тоҷикистон дар соҳаҳои маориф, тандурустӣ, кишоварзӣ ва рушди захираҳои инсонӣ татбиқи лоиҳаву фаъолиятҳори мухталифро идома дода истодааст.
