Додгоҳи ноҳияи Мир Сайид Алии Ҳамадонӣ як сокини ин ноҳияро барои латукӯб кардан ва бо тахтачӯб задани ҳамсараш, ки бо марги зан анҷомидааст, ба муддати 16 солу 6 моҳ ба зиндон маҳкум кардааст.
Дар ҳукми додгоҳ, аз маҳкумшуда Абдусамад Нуралиев ном бурда мешавад, ки бегоҳии рӯзи 5-уми декабри соли гузашта, бо ҳамсараш Оростамо Ахмедова, ҷанҷол карда, “бо мушт якчанд бор ба сари зан ва пасон бо тахтачӯб ба тамоми узвҳои бадани марҳум зарба задааст”.
Тибқи иттилои манбаъ, дар пайи ин зан ҷароҳати ҷисмонӣ бардошта, як рӯз баъди ҳодиса, 6-уми декабр дар манзили зисташ ҷон додааст. Ин ниҳод сабаби муноқишаи онҳоро нагуфтааст.
Дар қарори додгоҳ омадааст, ки маҳкумшуда дар мурофиа аз пайвандони ҳамсараш узрхоҳӣ карда, аз кори кардааш изҳори пушаймонӣ кардааст. Назари ӯ ба расонаҳо дастнорас аст.
Ин ҳукм кай содир шудааст, маълум нест. Вале он рӯзи 1-уми май дар сомонаи Додгоҳи ноҳияи Мир Сайид Алии Ҳамадонӣ нашр шуд. Назари пайвандони марҳум ба ҳукми додгоҳ ва ҳамчунин дар робита ба ин қазия маълум нест.
Бояд гуфт, ки марги занону аъзои оила дар пайи ҷанҷоли хонаводагӣ дар Тоҷикистон зиёд расонаӣ мешавад. Аз ҷумла моҳи октябри соли гузашта, Додгоҳи вилояти Хатлон як сокини ноҳияи Носири Хусрави ин вилоятро барои бо барқ куштани ҳамсараш ба муддати 21 сол аз озодӣ маҳрум кард. Ахиран Додгоҳи шаҳри Исфара як зани 36-соларо барои ба худкушӣ расонидани ҳамсари бародараш ба муддати 4 сол ба зиндон маҳкум кард.
