Вашингтон. 14-уми июл. ОИ «Азия-Плюс» – Дар Иёлоти Муттаҳидаи Амрико китоби нависандаи тоҷик Аминҷон Шукӯҳӣ «Об аз куҷо ҷорӣ мешавад?»
бо забони англисӣ ба чоп расид.
Чӣ тавре ки хабарнигори ОИ «Азия-Плюс» аз Вашингтон иттилоъ медиҳад, китоби мазкур бо нақшу мусаввараҳои ҷолиб дар мағозаҳои бузургтарини ИМА ба фурӯш бароварда шуда, дар Амрико якчанд маросими муаррифиномаи китоб дори гардидааст ва хонандагони нахустин аз он қаноатмандӣ изҳор кардаанд.
Аз замони нашри нахустини китоби мазкур зиёд аз се даҳсола паси сар шудааст, вале то ҳанӯз ғояи асар, ки муҳаббати кӯдакон ба ихтироот, арзиши баланди оби нӯшокӣ, нодир будани санъати боғдориро васф месозад, аҳамияти худро гум накардааст.
Ноширони амрикоӣ бар ин назаранд, ки саргузаштҳои қаҳрамонони асар – Асаду Самад натанҳо толибилмони Амрико, балки аксари ҳаводорони мутолиаи китобро ҳавасманд хоҳад сохт, зеро Тоҷикистону фарҳанги бостонии он то ҳанӯз мавриди таваҷҷӯҳи зиёд қарор доранд.
Асари «Об аз куҷо ҷорӣ мешавад?» аз ҷониби писари хурдии муаллифи асар – Карим Ҳоҷибоев ва ҳамсари ӯ – Муҳаббат Ҳоҷибоева, ки айни замон маскуни Амрикоянд, тарҷума шудааст.
