Душанбе. 6-уми июл – Дар шаҳри Самарқанди Ҷумҳурии Ӯзбакистон, ки маркази фарҳангу тамаддуни бостонии тоҷикон шинохта шудааст, муҷассамаи асосгузори адабиёти классикии тоҷик Абӯабдуллоҳи Рӯдакиро канданд. Муҷассама дар наздаи Осорхонаи давлатии таърихи фарҳанги мардуми Осиёи Миёна дар ин шаҳр побарҷо буд.
Тибқи иттилои хабаргузории Фергана.ру, дар яке аз шаҳрҳои бостонии ҷаҳон муддати чанд моҳ аст, ки ҷараёни таҷдиди кулли сохтори шаҳр идома дорад. Чанд рӯз пештар маҷмааи асари монументалии ҳайкалтарошӣ бахшида ба асосгузори адабиёти классикии ӯзбакӣ Алишери Навоӣ, ки аз санги хорои сурх бунёд гардида буд, низ канда шуд.
Кӯшишҳои муайян кардани тақдири минбаъдаи ин муҷассамаҳо ҳеҷ натиҷаи мушаххасе надодааст. Изҳороти расмӣ дар ин хусус садо надодааст. Намояндагони равшанфикрон бошанд, мегӯянд, мо худ намедонем, ки чӣ воқеа аст. Дар ҳамин ҳол овозаҳое маҷуданд, ки ин муҷассамаҳо дар ҷойи дигар гузошта хоҳанд шуд.
