Душанбе. 2-юми июн. ОИ «Азия-Плюс» – Дар гузаргоҳи сарҳадии Панҷи Поён задухӯрди марзбонони тоҷик бо қочоқбарони афғон ба вуқӯъ пайваст.
Чӣ тавре ки ба ОИ «Азия-Плюс» аз Сарраёсати нерӯҳои марзбонии Кумитаи давлатии амнияти миллӣ иттилоъ доданд, субҳи рӯзи 1-уми июн дар қаламрави таҳти назорати гузаргоҳи Панҷи-Поён қарордошта гурӯҳи қочоқбарони афғон тавассути рӯдхонаи Панҷ мехостанд марзи давлатии Тоҷикистонро убур намоянд, вале аз чашми сарҳадбонон пинҳон шуда натавонистанд. «Миёни марзбонону қочоқбарон задухӯрди мусаллаҳона сурат гирифта, як қочоқбар ҳалок ва як марзбон захмӣ шуданд», – гуфт манбаъ ва афзуд, ки қочоқбарони боқимонда ба хоки Афғонистон паноҳ бурданд.
Бино ба иттилои манбаъ, дар ҷойи ҳодиса 10 кило афюн ва 1 адад туфанчаи Макаров дарёфт шуд. «Роҳбарии гурӯҳи мазкурро шаҳрванди Афғонистон Қорӣ валади Ҳошим ба ӯҳда дошта, ин гурӯҳ якчанд маротиба дар сарҳад қонуншиканӣ кардааст», – афзуд манбаъ.
