Душанбе. 24-уми январ. ОИ «Азия-Плюс» – Дар Туркманистон Рӯзҳои кинои Тоҷикистон баргузор мешаванд.
Тибқи иттилои хабаргузории «ТУРКМЕНинформ», вазорати фарҳанг ва телевизиону радиошунавонии Туркманистон дар ҳамдастӣ бо сафорати Тоҷикистон ният доранд, рӯзҳои 26-28-уми январи соли ҷорӣ дар шаҳри Ашқобод ба муносибати 16-умин солгарди барқарории муносиботи дипломатӣ миёни кишварҳо Рӯзҳои кинои Тоҷикистонро баргузор намоянд.
Дар барномаи баргузории рӯзҳои кинои Тоҷикистон дар Туркманистон намоиши филмҳои миёни тамошобинони тоҷик писандида, аз қабили «Вақте болои шаҳр борон меборид», «Ман бо духтаре вохӯрдам», «Достони Сиёвуш» ва ғайра дар назар аст.
Намоиши филмҳо дар толори театри мусиқиву драмавии ба номи Махтумқулӣ баргузор мешавад.
