Суди шаҳри Қӯрғонтеппа пас аз анҷоми мурофиаи додгоҳии як парвандаи ҷиноӣ нисбат ба 3 нафар, ки дар содир кардани амали дуздӣ айбдор мешуданд, мақомоти тафтишотии масъули парвандаро бо таъиноти судӣ ба ҷавобгарии интизомӣ кашидааст.
Чӣ тавре ки ба ОИ «Азия-Плюс» Шариф Ҳаётов, ҳимоятгари яке аз маҳкумшудагон иттилоъ дод, сабаби ба ҷавобгарии интизомӣ кашидани муфаттишон дар нодуруст банду баст кардани ҷинояти содирнамудаи маҳкумшудагон ва ба гузаронидани ҳаракатҳои тафтишотӣ роҳ надодани ҳимоятгар мебошад.
Ҳаётов афзуд, ки мақомоти тафтишотӣ нисбат ба нафари зерҳимояи ӯ Саидмубилхон Ҷамолов ва ду нафар ҳамроҳонаш бо моддаи 244, қисмҳои 2 ва 3 КҶ ҶТ айб эълон карда буд. Аммо ҳангоми тафтишоти судӣ айби эълоннамудаи тафтишоти пешакӣ тасдиқи худро наёфт.
Ба гуфтаи ҳимоятгар, суд Садмубилхон Чамолов, инчунин ҳамроҳонаш Сӯҳробиддин Қаюмов ва Нуралӣ Сатторовро бо моддаи 244, қисми 2 КҶ ҶТ гунаҳкор дониста, ба мӯҳлати 3 сол маҳрумият аз озодӣ ҳукм баровард. Аммо раисикунандаи мурофиаи судӣ нисбат ба ҳар се нафар маҳкумшуда Қонуни ҶТ «Дар бораи афв»-ро татбиқ намуда, онҳоро аз толори додгоҳ озод кард.
Дар рӯзи аввали мурофиа судшаванда Саидмубилхон Ҷамолов шикоят карда буд, ки ҳангоми тафтиши пешакӣ нафарони номаълум (агар онҳоро бинад, мешиносад) ӯро мавриди латукӯб қарор додаанд ва як ҷиноятро, ки содир накардааст, иҷборан ба ӯ бор кардаанд.
Оид ба ин рафтори кормандони милитсия Ҷамолов ба прокуратураи вилояти Хатлон шикоят бурдааст. Дар робита сардори шӯъбаи назорати иҷрои қонунҳо дар мақомоти корҳои дохилӣ ва назорати маводи нашъаовари прокуратураи вилояти Хатлон Қутбиддин Достиев гуфт, ки ба прокуратураи вилояти Хатлон мактуби шикоятии Ҷамолов дар хусуси он, ки кормандони милитсия ӯро латукӯб кардаанд ва дар натиҷа ҷароҳати сабуки ҷисмонӣ бардоштааст, ворид гардида буд.
«Мо оид ба ин шикояти Ҷамолов санҷиши прокурорӣ гузаронидем, аммо ваҷҳҳои овардаи ӯ тасдиқи худро наёфтанд. Аз ин рӯ, мо қарор дар бораи рад кардани оғози парвандаи ҷиноиро қабул намуда, аз натиҷаи санҷиш ба Ҷамолов ҷавоби хаттӣ фиристодем», – гуфт прокурор.
