Дар нуқтаҳои ҷудогонаи фурӯши маводи сӯзишвории шаҳри Хуҷанд поинравии начандон назарраси қимати бензин ба мушоҳида мерасад.
Айни замон дар яке аз нуқтаҳои фурӯши маводи сӯзишвории ширкати «Газпромнефт-Тоҷикистон» дар шаҳри Хуҷанд қимати бензини навъи Аи-95 ба 6,4, Аи-92 муодили 6,1 ва як литри сӯзишвории дизелӣ ба 5,5 сомонӣ баробар аст.
Дар дигар нуқтаи фурӯш, ки ба фирмаи «Tom oil» мутааллиқ аст, арзиши бензини навъҳои Аи-95, Аи-92 ва ҳамчунин сӯзишвории дизелӣ нисбат ба фурӯшгоҳи ширкати «Газпром» 10 дирам арзонтар аст.
Вазъи поинравии начандон назарраси маводи сӯзишвориро коршиносони соҳа ба шадид шудани рақобат дар бозор рабт медиҳанд.
Як коршиносе, ки аз ифшои ному насабаш худдорӣ варзид, дар робита ба ин масъала гуфт, рақобати ширкатҳои хурд бо ширкатҳои бузург, ки хизматгузории хубро пешниҳод мекунанд, хеле душвор аст ва аз ин рӯ, онҳо мизоҷонро бо поин овардани нарх ҷалб месозанд.
Дар идома ӯ ҳамчунин зикр кард, ки дар навбати худ ширкатҳои бузурги таъминкунандаи минтақаи шимоли ҷумҳурӣ бо бензин низ мушкилоти муайяне доранд, зеро онҳо ба таври қонунӣ фаъолият дошта, бо маводи сӯзишвории ба таври қочоқ воридшуда низ дар рақобат ҳастанд.
Нисбат ба шаҳри Хуҷанд арзиши бензин дар ноҳияҳои наздимарзии вилояти Суғд боз ҳам арзонтар мебошад. Ба гунаи мисол метавон гуфт, ки қимати як литр бензини навъи Аи-92 дар ноҳияи Бобоҷон Ғафуров 6 сомониро ташкил медиҳад, ки дар муқоиса бо маркази вилоят 20 дирам поинтар аст.
