Вазорати мудофиаи Тоҷикистон 105 нафарро аз хобгоҳи вазорат воқеъ дар ҷамоати Пахтаободи шаҳри Турсунзода кӯчониданист.
Вазорати мудофиа ин тасмими худро ба он шарҳ медиҳад, ки ин нафарон хизматчиёни ҳарбӣ набуда, дар хобгоҳ ғайриқонунӣ иқомат доштаанд.
Ба идораи ОИ «Азия-Плюс» бидуни ифшои ному насаб чанде аз иқоматкунандагони хобгоҳи мазкур муроҷиат карда, изҳор намуданд, ки дар ин хобгоҳ беш аз 100 нафар зиндагӣ карда, зиёда аз 10 сол пештар дар ин ҷо манзил гирифтаанд.
«Мо ҳамеша маблағи хизматгузориҳои коммуналиро пардохт намуда, ҳатто гумон надоштем, ки мо дар ин ҷо ба қайд гирифта нашудаем ва тӯли ин 10 сол ҳеҷ кас аз мо ҳуҷҷате ҳам напурсидааст. Чанде қабл намояндагони Суди ҳарбии Душанбе аз мо дархост карданд, ки хобгоҳро холӣ намоем, вагарна моро маҷбурӣ мекӯчонидаанд», – иброз доштанд онҳо.
Ба ивази ҳуҷра дар хобгоҳ ба онҳо дар теппаҳои наздиктарин 12 сотихӣ қитъаи замин пешниҳод кардаанд, вале онҳо ба ин розӣ нестанд, зеро аксари онҳо дар шаҳр кор карда, фарзандонашон дар мактабҳо таҳсил мекунанд ва гузашта аз ин, бисёре аз онҳо ба сохтмони манзил дар қитъаҳои замин маблағе ҳам надоранд.
Онҳо умедворанд, ки ба мушкилоташон сарвари давлат расидагӣ мекунад. Сокинони хобгоҳ чандин маротиба бо мактуби расмӣ ба Дастгоҳи иҷроияи сарвари давлат муроҷиат кардаанд, вале то ҳанӯз посухе нагирифтаанд.
Ба эътиқоди сокинон, мушкилоти будубоши онҳо дар хобгоҳ акнун дар суд ҳал мешавад, зеро Вазорати мудофиа ба Суди ҳарбии Душанбе бо аризаи даъвогӣ муроҷиат карда, дар он далел пеш овардааст, ки ҳанӯз соли 2005 бо қарори ҳукумат бинои хобгоҳ аз тавозуни Вазорати меҳнат ва ҳифзи иҷтимоии аҳолӣ ба тавозуни Вазорати мудофиа гузаронида шудааст.
Ҳамчунин дар аризаи даъвогӣ зикр шудааст, ки аз он замон Вазорати мудофиа чандин маротиба ҷиҳати аз сокинон холӣ кардани хобгоҳ ба ҳукумати шаҳри Турсунзода, сарпрокурори ҳарбии ҶТ ва раиси ҷамоати Пахтаобод хаттиву шифоҳӣ муроҷиат намудааст.
«Санҷиши соли равон нишон дод, ки дар хобгоҳ оилаҳое зиндагӣ мекунанд, ки ба хизмати ҳарбӣ ҳеҷ муносибате надоранд ва ғайриқонунӣ аз ин ҷо манзил гирифтаанд. Илова бар ин, чун дар паҳлӯи хобгоҳ қисми низомӣ воқеъ аст, иқомат ва гаштугузори шахсони бегона ба Оинномаи Қувааҳои Мусаллаҳ ва Қонуни ҶТ «Дар бораи мақоми ҳуқуқии хизматчиёни ҳарбӣ» мухолифат мекунад», – гуфта мешавад дар аризаи даъвогии Вазорати мудофиа.
Баррасии маводи аризаи даъвогии Вазорати мудофиа ба рӯзи панҷшанбеи ҳафтаи оянда таъин шудааст.
