Чанде қабл Ваколатдор оид ба ҳуқуқи инсони Тоҷикистон (Омбудсмен) Зариф Ализода аз шаҳри Кӯлоб боздид намуд.
Бино ба гуфтаи З.Ализода, ҳадаф аз сафар бо мақомоти шаҳрдорӣ ҳал кардани масъалаи ҷудо кардани бино барои таъсиси қабулгоҳи ҷамъиятии Ваколатдор оид ба ҳуқуқи инсон дар Кӯлоб аст.
«Қабулгоҳи Кӯлоб 8-умин қабулгоҳ оид ба ҳуқуқи инсон дар саросари ҷумҳурӣ буда, ин ҷо низ чун дар дигар қабулгоҳҳо 2 корманди соҳибтахассус муроҷиати шаҳрвандонро қабул хоҳанд кард», – гуфт вай.
Амалисозии лоиҳа оид ба таъсиси қабулгоҳҳои ҷамъиятӣ ва фаъолияти онҳо тӯли ду соли ахир аз ҷониби як ниҳод оид ба ҳуқуқи инсони Дания маблағгузорӣ мешавад.
«Бо назардошти арзу шикояти расида аз минтақаи Кӯлоб ба Дафтари асосии мо ин минтақа аз минтақаҳои дгари Тоҷикистон ҳеҷ тафовуте надорад, вале вазъи воқеӣ пас аз ба фаъолият пардохтани қабулгоҳи ҷамъиятӣ возеҳтар мегардад», – иброз дошт Ализода.
Бо истифода аз фурсати муносиб Омбудсмен барои кормандони мақомоти ҳифзи ҳуқуқ, прокуратура ва суди минтақа оид ба мавзӯи риояи ҳуқуқи инсон семинар баргузор кард. Аз Кӯлоб З.Ализода ба шаҳри Хоруғ раҳсипор гардид. Дар Хоруғ низ ояндаи наздик қабулгоҳи ҷамъиятии Ваколатдор оид ба ҳуқуқи инсони Тоҷикистон кушода мешавад.
