Бино ба маълумоти натоиҷи назарсанҷии Expat Explorer, ки аз ҷониби гуруҳи бонкии HSBC гузаронида шуд, соли 2011 Арабистони Саъудӣ кишвари беҳтарин дар саросари ҷаҳон барои муҳоҷирони корӣ арзёбӣ гардид. Сарфи назар аз тафовути зиёд дар музди меҳнати пасттарину баландтарин, Русия низ ба қатори чор кишвари беҳтарин дар ин рӯйхат шомил шуд.
Ба қатори аввали рӯйхат кишварҳое ҷой гирифтанд, ки дар он муҳоҷирон худро бештар осуда ҳис мекунанду аз кори кардаашон музди шоиста мегиранд.
Сафи даҳгонаи аввалини кишварҳои беҳтарин барои муҳоҷирон дар соли 2011 ба тариқи зайл аст: 1) Арабистони Саъудӣ; 2) Миср; 3) Сингапур; 4) Русия; 5) Швейтсария; 6) Қатар; 7) Мексика; 8) Гонконг; 9) Аморати Муттаҳидаи Араб ва 10) Таиланд.
Тибқи баъзе маълумот, айни замон аз қариб аҳолии 8 млн. нафараи Тоҷикистон беш аз 1 млн. нафар муҳоҷирати корӣ ва будубош дар Русияро ихтиёр кардаанд.
Бино ба маълумоти Бонки марказии Русия, соли 2011 бо истифода аз низомҳои интиқоли маблағҳои пулӣ ва почтаи Русия шахсони воқеӣ аз Русия ба Тоҷикистон беш аз 3 млрд. $ маблағ интиқол додаанд.
Ҳаҷми умумии интиқоли маблағҳои пулии шахсони воқеӣ аз Русия ба Тоҷикистон дар соли гузашта қариб 50 дарсади ҳаҷми Маҷмӯи маҳсулоти дохилии ҷумҳурӣ дар соли 2011-ро ташкил дода, аз ҳаҷми қисми даромади буҷети давлатии соли 2011 ба андозаи 42 дарсад бештар аст.
Ёдрас мекунем, ки соли гузашта ҳаҷми Маҷмӯи маҳсулоти дохилии Тоҷикистон беш аз 30 млрд. сомонӣ (зиёда аз 6,3 млрд. $) ва даромади буҷет 8,3 млрд. сомонӣ (зиёда аз 1,74 млрд. доллари ИМА)-ро ташкил дод.
