Бар асари ду ҳодисаи садамаи нақлиёти рӯзи 23-юми май дар Тоҷикистон се нафар ҳалок ва 6 тан ҷароҳатҳои гуногуни ҷисмонӣ бардоштанд.
Тавре аз Вазорати корҳои дохилии ҷумҳурӣ хабар доданд, садамаи аввал дар километри 27-уми роҳи мошингарди Хоруғ-Роштқалъа рух дод. Ронандаи 22-солаи автомашинаи «Мерседес-Бенс» аз ӯҳдаи идораи воситаи нақлиёт набаромада, ду роҳгузарро бо мошин пахш кардааст, ки дар натиҷа зани 66-сола ва навраси 11-сола дар ҷойи ҳодиса ба ҳалокат расидаанд.
Ба иттилои манбаъ, ҳодисаи дигар дар километри 130-юми роҳи автомобилгарди Рашт-Ҷиргатол ба вуқӯъ пайвастааст. Дар ин ҷо низ ронандаи автомашинаи «Опел-Астра» аз ӯҳдаи идораи воситаи нақлиёт набаромада, автомашина чаппа шудааст. Дар натиҷа мусофири 6-сола ҳалок ва ронандаву боз панҷ мусофири дигар ҷароҳатҳои гуногуни ҷисмонӣ бардоштаанд.
