Дар зарфи 5 моҳи соли равон ба Тоҷикистон аз 31 кишвари хориҷи дуру наздик кӯмаки башардӯстона ворид гардид. Маблағи умумии кӯмак беш аз 36,2 млн. доллари ИМА-ро ташкил дод.
Бино ба маълумоти Агентии омори назди президенти ҷумҳурӣ, ҳаҷми кӯмаки ба Тоҷикистон дар ин давра воридгардида беш аз 8,2 ҳазор тоннаро ташкил дод. Дар ин давра ба сифати кӯмаки башардӯстона ба ҷумҳурӣ беш аз 4,9 ҳазор тонна орд ба маблағи зиёда аз 2,1 млн. $, 374,9 тонна равғани рустанӣ ба маблағи 605 ҳазор $, воситаҳои дорувориву таҷҳизоти тиббӣ ба маблағи умумии 17,5 млн. $, сарулибос ва пойафзол ба маблағи 456 ҳазор $, дигар маҳсулоти ғизойӣ, кӯрпаву кампал, таҷҳизоти барқиву компютерӣ ва ғайра ворид гардиданд.
Миёни кишварҳои мададрасон вазни нисбатан хос аз рӯи арзиши кӯмаки башардӯстона ба ИМА – 50,5%, Миср – 5,8%, Нидерланд – 4,6%, Чин – 3.%, Олмон – 3,4%, Фаронса – 3,3%, Ҷумҳурии Корея – 3,1%, Латвия – 2,8%, Эрон – 2,8%, Дания – 1,9% ва миёни кишварҳои узви ИДМ – Русия – 10,2% ва Қазоқистон – 2,9% рост меояд.
