Агентии ИМА оид ба рушди байналмиллалӣ (USAID)системаи барқароршудаи таъмини оби нӯшокиро ба муассисаи обтаъминкунии ноҳияи Бохтар расман супорид. Ин муассиса зиёда аз 1900 бошандагони шаҳраки Исмоили Сомонии ноҳияи Бохтарро бо оби нӯшоки таъмин менамояд.
Тавре аз сафоратхонаи ИМА дар Тоҷикистон хабар доданд, ба маросими мазкур раиси ноҳияи Бохтар, ҷаноби Абдуалим Исмоилов ва Директори минтақавии USAID оид ба масъалаҳои демократия ва идоракунӣ дар Осиёи Марказӣ ҷаноби Дэвид Хофман ифтитоҳ бахшиданд. Инчунин намояндагони расмии мақомоти иҷроияи ноҳия, дастгоҳи ҷамоат ва истиқоматкунандагони шаҳраки Сомониён дар он ширкат варзиданд. Ин лоиҳа қисми лоиҳаи USAID «Ташаббуси рушди маҳаллӣ» мебошад, ки дар 6 ноҳияи Тоҷикистон ҷиҳати беҳтар намудани сифати идоракунии маҳаллӣ ва хизматрасонӣ амалӣ шудаистодааст.
Ба иттилои манбаъ, дар суханронии худ ҷаноби Д. Хоффман чунин қайд кард: «Манбаҳои тозаи оби нӯшокӣ барои шаҳрвандони Тоҷикистон яке аз мақсадҳои дарозмуддати USAID мебошанд, ки онҳо ба беҳтар намудани саломатӣ мусоидат намуда, ба рушди иқтисод ва сулҳу субот дар минтақа таъсири бевосита мерасонад. «Мо хеле хурсандем, ки ба истиқоматкунандагони шаҳраки Исмоили Сомони кӯмаки худро дар ноил гаштан ба чунин мақсад расонидем. Инчунин мехостем ҳокимияти маҳаллии ноҳияи Бохтар ва шаҳрвандони онро барои ҳамкории фаъолона ҷиҳати гузоштани саҳми беандоза дар рушди системаи обтаъминкунии мазкур, табрик намоем»», – гуфт ӯ.
Бошандагони кӯчаҳои Гагарин, Шевченко ва Синои шаҳраки Исмоили Сомонӣ ва ҳокимияти маҳаллии ноҳияи Бохтар дар ҳамкорӣ бо USAID 1792 метр қубурҳоро бо мақсади таъмин намудани аҳолӣ бо оби нӯшокӣ гузарониданд. Системаи об, ки бошандагони маҳалларо бо оби нӯшокӣ таъмин менамояд, соли 1968 барқарор гардида, аз соли 1970 то ин ҷониб таъмир нашудааст. Соли 2008 қубурҳои об пурра аз кор баромада, таъминоти об ба аҳолӣ қатъ гардид. Ҳамчун қисми лоиҳаи мазкур USAID инчунин бар ивази қубурҳои обии умумӣ дар хонаводаҳои алоҳида қубурхои обтаъминкунӣ гузаронид. Инчунин ба истиқоматкунандагон пешниҳод гардид, ки дар ҳар як нуқта асбоби ченкунӣ васл намоянд, ки он ба пардохти маблағ аз рӯи ҳаҷми истифодашудаи об имконият медиҳад.
Системаи обатаъминкунӣ аз ҷониби хадамоти обтаъминкунии ноҳияи Бохтар истифода ва нигоҳубин карда мешавад, ки он баҳри таъмини мунтазами аҳолӣ бо оби тозаи нӯшоки аз ҷониби USAID дастгирии техникӣ ёфт. USAID инчунин барои намояндагони расмии ҷамоат ва муҳандисон дар масъалаҳо оид ба нархгузорӣ , ҷамъоварии маблағ, баҳисобгирии муҳосибӣ ва самаранок нигоҳубин кардан ва истифода бурдани идоракунии ва истифодабарии иншоотҳои обтаъминкунӣ омӯзишҳо мегузаронад.
Лоиҳаи «Ташаббуси рушди маҳаллӣ» яке аз лоиҳаҳои зиёд оид ба кӯмак мебошад, ки аз ҷониби мардуми Амрико тавассути USAID дастгирӣ ёфтааст. Сафорати ИМА дар шаҳри Душанбе аз соли 1992 то инҷониб зиёда аз 984 милион долларро барои амалӣ гардонидани барномаҳое, ки бехатарӣ, институтҳои демократӣ, бахши иҷтимоӣ ва рушди иқтисодиро дар Тоҷикистон дастгирӣ менамоянд, ҷудо намудааст.
