Дар Кӯлоб насби таҷҳизоти корхонаи хурди нав оид ба истеҳсоли маснуоти макаронӣ шурӯъ шуд.
Тавре ба ОИ «Азия-Плюс» муовини раиси шаҳри Кӯлоб Рустам Неъматов хабар дод, таҷҳизоти корхонаи нав аз Олмон оварда шуда, насби онро низ мутахассиси олмонӣ анҷом медиҳад.
Ба гуфтаи ӯ, бо мавриди истифода қарор гирифтан корхона метавонад тамоми бозори маснуоти макарониро таҳти инҳисор (монополия) қарор диҳад. «Иқтидори корхона ба истеҳсоли 250 кило маҳсулот дар як соат баробар буда, ғайр аз ин, дар як вақт бо истифода аз таҷҳизоти истеҳсоли Туркия коргоҳи истеҳсоли орд низ қомат меафрозад», – гуфт ӯ.
Неъматов изҳор кард, ки барои истеҳсоли маснуоти макаронӣ гандуми навъи олӣ аз Қазоқистон харидорӣ шуда, дар ин хусус бо шарикони имконпазир гуфтушунид ҷараён дорад.
Дар ҳамин ҳол, фирмаи «Файзи Амир»-и шаҳр се коргоҳи истеҳсоли барак (пелмени) ва истеҳсоли маснуоти шириву қаннодиро ба истифода дод. Дар ин коргоҳҳо 23 мутахассис бо ҷойи корӣ таъмин шуда, фирма дар як баст то 1 тонна маҳсулоти ширӣ, 100 кило барак ва 400 кило маснуоти қаннодӣ истеҳсол мекунад. Дар зарфи 6 моҳи соли равон дар шаҳри Кӯлоб 20 адад корхонаҳои истеҳсолии соҳибкорони хусусӣ мавриди истифода қарор гирифтанд.
