Чанде қабл дар пойтахти Эрон – шаҳри Теҳрон Ҳамоиши ҷаҳонии «Занон ва Бедории исломӣ» ба кор шурӯъ кард. Дар кори он беш аз 1 ҳазору 200 нафар занон аз 80 кишвари дунё ширкат доранд.
Қобили зикр аст, ки чорабинии мазкур бо ибтикори Маҷмаъи ҷаҳонии Бедории исломӣ, ки соли 2011 дар Теҳрон бо иштироки 700 тан фаъолон аз 81 кишвари дунё таъсис дода шуд, доир мегардад. Дар чаҳорчӯби қарорҳои қабулшуда Маҷмаъи ҷаҳонии Бедории исломӣ моҳи январи соли равон дар Теҳрон таҳти унвони «Ҷавонон ва Бедории исломӣ» конфронси байнулмилалӣ баргузор намуд.
Дар маросими ифтитоҳи ҳамоиш президенти Эрон Маҳмуди Аҳмадинажод, дабири кулли Маҷмаи Ҷаҳонии Бедории Исломӣ Алиакбари Вилоятӣ, собиқ нахуствазири Ироқ Иброҳим Ҷаъфарӣ, роҳбари Шӯрои олии исломии Ироқ Аммар Ҳаким ва дигар шахсони расмӣ иштирок карданд.
Дар маросими кушоиши ҳамоиш президенти Эрон Маҳмуди Аҳмадинажод ва дабири кулли Маҷмаи Ҷаҳонии Бедории Исломӣ Алиакбари Вилоятӣ суханронӣ карданд.
Алиакбари Вилоятӣ аз ҷумла зикр кард, ки занони намояндагони халқҳои гуногун ва гурӯҳҳои этникӣ бори нахуст аст, ки ба ин миқдор дар ин ҳамоиш гирдиҳам меоянд ва то ҳанӯз ин шумори занон дар ҳеҷ ҳамоиши дигари ҷаҳонӣ ба мушоҳида нарасидааст.
Алиакбари Вилоятӣ зикр кард, ки барои иштирок дар кори ҳамоиш қаблан 6 комиссия таъсис дода шуда, ба ин комиссия ҷиҳати омӯзиш беш аз 400 маводи илмӣ пешниҳод гардиданд. Дар асоси натиҷаи кори ин комиссияҳо Изҳороти умумии ҳамоиш қабул хоҳад шуд.
Қобили зикр аст, ки дар кори ҳамоиш таҳти сарварии узви Шӯрои сиёсии ҲНИТ Зарафо Раҳмонӣ ҳайати Тоҷикистон низ иштирок дорад. Ба ҳайати Тоҷикистон фаъолзанони Ҳизби наҳзати исломии Тоҷикистон ва Ҳизби демократии Тоҷикистон шомиланд.
