Шӯрои сиёсии Ҳизби наҳзати исломии Тоҷикистон вазъияти шаҳри Хоруғи ВМКБ- ро мавриди баррасӣ қарор дода, куштори ноҷавонмардонаи яке аз шахсиятҳои маъруф ва баобрӯи минтақа Имомназар Имомназаровро маҳкум менамояд, – гуфт мешавад дар изҳороти Шӯрои сиёсии ҳизб.
Дар изҳорот зикр мегардад, ки дар ба эътидол омадан ва истиқорори амну субот баъди амалиёти низомӣ дар вилоят саҳми марҳум И. Имомназаров хеле бузург аст. «Номбурда тавонист мардум ва ҷавонони бадахшониро барои ба замин гузоштани аслиҳаи худ мутақоид созад ва роҳро барои музокираву ҳалли мусолиматомез фароҳам биёрад. Дар зимн аввалин шуда, силоҳҳои худ ва ҷонибдоронашро ба мақомот таслим намуд, ки инро метавон нишонаи сулҳдӯстӣ ва ватанхоҳии марҳум донист», – омадааст дар изҳорот.
Ҳамчунин гуфта мешавад, «аз фурсат истифода карда, бадхоҳони миллат ва субот даст ба куштори ӯ зада, вазъияти ин минтақаро дубора ноором сохтанд ва эътимоду боварии мардумро барои ҳалли осоиштаи ин ҳолати бӯҳронӣ зери суол бурданд».
Шӯрои сиёсии ҲНИТ аз мақомоти давлатӣ даъват мекунад, ки ба хотири таъмини амну субот ва волоияти қонун дар минтақа қотилони И. Имомназаровро ҳарчи сареътар боздошт ва ба ҷавобгарии ҷиноӣ бикашад.
Дар идомаи изҳорот баён мегардад, ки дар чунин лаҳзаи ҳасос тамоми мақомоти давлатӣ бояд тибқи вазифа ва салоҳияти конститутсионии худ амал намуда, дар ҳалли қазияи мазкур бетараф набошанд. Аз ҷумла Президенти кишвар ва Маҷлиси намояндагонро лозим аст, ки бевосита дар ҳалли масъала дахолат намоянд ва дар сурати зарурат барои баррасии масъала комиссияи парлумонӣ таъсис дода шавад.
«Шӯрои сиёсии ҲНИТ аз ҳама иқдомҳои сулҳҷӯёна дар Бадахшон ҷонибдорӣ намуда, ягона роҳи ҳалро дар идомаи муколама ва роҳҳалҳои мусолиматомез мебинад», – омадааст дар фарҷоми изҳорот.
