Пас аз қатъи қариб думоҳаи дастрасӣ ба сомонаи «Азия-Плюс» дар Тоҷикистон, имрӯз як қатор ширкатҳои фароҳамгари Иннтернет дастрасӣ ба онро барқарор намуданд.
Айни замон мавҷуд будани супориши расмии Хадамоти алоқа дар ин хусус маълум нест, зеро ба огаҳии ОИ «Азия-Плюс», ҳеҷ кадоме аз ширкатҳои фароҳамози интернет онро нагирифтааст.
Ба ҳар ҳол, дар мусоҳиба ба радиои «Озодӣ» сардори Хадамоти алоқаи назди ҳукумати ҶТ Бег Зуҳуров изҳор кардааст, ки барои барқарор намудани дастрасӣ ба торнамои «Азия-Плюс» дастур додаааст. «Акнун вақти он аст, ки ин торнамо бамаънӣ бошад ва аз пайи ҳаргуна танқидҳои ноҷо наравад, – гуфтааст ӯ.
Дар ҳамин ҳол, дар мусоҳиба ба ОИ «Азия-Плюс» Бег Зуҳуров гуфт, ҷиҳати қатъи дастрасӣ ба ин сомона ҳеҷ супорише надодааст. «Мо гурӯҳе дорем, ки бо сомонаҳои дорои маводи номатлуб сарукор доранд, вале торнамои шумо ба ин рӯйхат шомил нест», – иброз дошт Зуҳуров.
Ба қавли номбурда, сомонаи «Азия-Плюс»-ро ширкатҳои фароҳамсози Интернет ё худ провайдерон мустақилона бастаанд. «Барои муайян кардани сабаби бидуни асосе қатъ кардани дастрасӣ ба ин сомонаи иҷтимоӣ, ман бо ин ширкатҳо гуфтушунид хоҳам кард», – ваъда дод Зуҳуров.
Ёдрас мекунем, ки тайи се моҳи ахир дастрасӣ ба сомонаи ОИ «Азия-Плюс» – www.news.tj (
www.asiaplus.tj
) се маротиба қатъ гардида, ду дафъаи аввал дастрасӣ баъди як шабонарӯз дубора барқарор гардида буд.
Дар худи идораи ОИ «Азия-Плюс» дастрасӣ ба сомона алҳол тавассути домени нав – www.asia-plus.tj имконпазир аст, вале аксари пас аз фаъол шудани он, аксари провайдерон дарҳол дастрасӣ бо ин нишонаро низ қатъ намуданд.
Дар Тоҷикистон ҳамоно дастрасӣ ба видео-хостини бузург Youtube ва чанде аз сомонаҳои Русия ғайриимкон аст. Торнамои ОИ Tojnews низ ба сафи сомонаҳои дасрасиашон имконнопазир шомил гардид.
