Кӯлоб. 17-уми июл. ОИ «Азия-Плюс» – Дар шаш моҳи соли 2008 шӯъбаҳои «Агроинвестбонк» дар минтақаи Кӯлоби вилояти Хатлон ба андозаи 25 млн. 529 ҳазор сомонӣ қарз доданд, ки нисбат ба ҳамин давраи соли гузашта тақрибан ду баробар зиёд аст.
Мудири шӯъбаи бонк дар Кӯлоб Сайфиддин Қадамов изҳор дошт, ки 63 фоизи мабалғҳои қарзӣ ба хоҷагиҳои деҳқонии пахтакор ихтисос дода шудаанд.
«Шӯъбаи бонк дар минтақа фаъолияти 219 хоҷагиҳои пахтакорро, ки 9 ҳазору
660 гектар
майдони кишти пахта доранд, аз ҷиҳати молиявӣ дастгирӣ мекунад», – гуфт ӯ ва афзуд, ки аз хоҷагиҳои пахтакор ҷиҳати молиягузорӣ ба маблағи 17 млн. сомонӣ дархост пешниҳод шудааст, ки 12 млн. аз он аллакай ҷудо гардидаанд.
Ба қавли ӯ, дар минтақа эътимоду боварӣ ба «Агроинвестбонк» миёни муҳоҷирони меҳнатӣ меафзояд ва дар нимсолаи аввал ба оилаҳои муҳоҷирон 28 млн. доллари амрикоӣ ва 43 млн. рубли русӣ маблағҳои пулӣ дода шудааст, ки дар муқоиса ба ҳамин давраи соли гузашта 90 фоиз бештар аст.
Барои осонии дастрас кардани маблағ дар деҳаҳои дурдасти минтақа 6 нуқтаи гирифтани маблағҳои пулӣ ифтитоҳ гардидааст.
