Хоруғ. 19-уми июл. ОИ «Азия-Плюс» – Президенти Ҷумҳурии Тоҷикистон имрӯз дар ҳошияи боздиди худ аз Вилояти Мухтори Кӯҳистони Бадахшон (ВМКБ) ба ноҳияи Ишкошим рафт.
Аз маъмурияти раиси вилоят ба ОИ «Азия-Плюс» хабар доданд, ки дар ин ҷо сарвари давлат бо шароити хизмату зисти афсарону сарбозони яке аз қисмҳои низомии ҷумҳурӣ, ҷараёни азхудкунии
100 гектар
заминҳо, корҳои тадқиқотии беҳтар кардани навъи тухмиҳои хушсифати зироати ғалладона, картошка ва зироатҳои дигари кишоварзӣ шинос мешавад. Пас аз ин Э.Раҳмон ният дорад, бо сокинони ноҳия мулоқот орояд.
Дар нимаи дуюми рӯз сафари президент ба ноҳияи Роштқалъа ба нақша гирифта шудааст, ки он ҷо ӯ дар маросими мавриди истифода қарор гирифтани бинои шӯъбаи маориф ва гузоштани хишти аввал ба таҳкурсии сохтмони бинои шӯъбаи Бонки амонатгузории давлатии «Амонатбонк» ширкат хоҳад варзид.
Тавре қаблан хабар додем, шоми имрӯз сарвари давлат дар маросими ифтитоҳи варзишгоҳи таҷдидшудаи шаҳри Хоруғ иштирок намуда, ният дорад, дар он ҷо бо сокинони шаҳр мулоқот доир кунад. Ҳамчунин дар варзишгоҳ намоиши тетарикунонидашуда баргузор мешавад.
Пагоҳ сарвари дават дар шаҳри Хоруғ бо ҷараёни корҳои сохтмонии Донишгоҳи Осиёи Марказӣ шинос гардида, ба таҳкурсии бунёди бинои гимназияи президентӣ хишти аввал мегузорад ва дар маросими ифтитоҳи маркази савдо ширкат меварзад.
Интизор меравад, ки дар анҷоми сафар Эмомалӣ Раҳмон бо фаъолони вилоят ҷаласаи васеъ доир месозад, ки дар он натиҷаҳои рушди иҷтимоиву иқтисодии вилоят дар нимсолаи аввал мавриди баррасӣ қарор гирифта, вазифаҳои минбаъда муайян карда хоҳанд шуд.
Ёдрас мекунем, ки президенти Тоҷикистон бо сафари серӯза дар таърихи 18-уми июл ба ВМКБ рафт.
