Душанбе. 16-уми октябр. ОИ «Азия-Плюс» –
Созмони Милали Муттаҳид (СММ) аз Хазинаи марказии рафъи оқибатҳои вазъи фавқулодда ба занону кӯдакони Тоҷикистон ба маблағи
$200 ҳазор кӯмаки ғизоӣ ҷудо кард. Дар ин бора Маркази иттилооти СММ хабар медиҳад.
Ба ҳамин тариқ, ҳаҷми умумии маблағи ҷудонамудаи ин Хазина аз оғози таъсиси он дар соли 2006 ба 1 млрд. доллари амрикоӣ расидааст. Сухангӯи СММ дар як нишасте дар шаҳри Ню-Йорк гуфтааст, ки маблағи ҷудогардида ба Тоҷикистон барои рафъи оқибатҳои ногувори бӯҳрони ғизоӣ дар ин кишвар равона мегардад.
Дар маҷмӯъ, аз соли 2006 то ба имрӯз аз ҳисоби ин Хазина ба 65 кишвари дунё кӯмакпулиҳо ихтисос дода шудаанд. Хазинаи мазкур бо сармояи оинномавии 500 миллион доллари амрикоӣ аз ҳисоби пардохтҳои ихтиёрии кишварҳои узв, бахши хусусӣ ва ҳамаи хоҳишмандон ташаккул ва афзоиш меёбад.
Ёдрас мекунем, ки Бонки ҷаҳонӣ ахиран Тоҷикистонро аз қабили кишварҳои фақиртарин ва осебпазири ҷаҳон аз ҷиҳати амнияти ғизо дониста, аз кишварҳои ёрирасон тақозо кард, то ҷиҳати ҳалли мушкилоти ғизо ба Тоҷикистон наздики 35 миллион доллари амрикоӣ кӯмак кунанд.
