Душанбе. 12-уми ноябр. ОИ «Азия-Плюс» – Дар шарҳи масъалаи хориҷ шудани Ӯзбекистон аз ҳайати Иттиҳоди иқтисодии Авруосиё (ЕвраЗЭС) мудири кафедраи ҳуқуқ ва муносиботи байнулмилалии Донишгоҳи байнулмилалии Тоҷикистон Шокирҷон Ҳакимов изҳор дошт, ки қабули чунин қарор ногаҳонӣ набуда, аз он интизор мерафт.
Ба қавли ӯ, ахиран хуб шудани муносибати ин кишвар бо мамлакатҳои Ғарб ба мушоҳида мерасад ва Иттиҳоди Аврупову Америка таҳримҳои чанде қабл ҷорисохтаашонро нисбати Ӯзбекистон ба иллати гӯё беҳ гаштани вазъи рияои ҳуқуқи инсон муваққатан бекор кардаанд.
Номбурда мегӯяд, дар ҳоли бад шудани муносиботи Русия бо кишварҳои Ғарб чунин тасмими Ӯзбекистон аз он гувоҳӣ медиҳад, ки Тошканд афзалиятҳои сиёсати хориҷии худро қатъан ба манфиати Ғарб тағйир медиҳад. «Қарори раҳбарияти кишвари ҳамсоя қобили қабул буда, ҳузури минбаъдаи ин давлат дар иттиҳод аслан самаранок нахоҳад буд», – гуфт ӯ.
Ш.Ҳакимов бар ин назар аст, ки созмонҳои байнулмилалие, ки дар қаламрави ИДМ амал мекунанд, аслан фаъолияти назаррасе надоранд ва бештар на ба ҳалли мушкилоти иҷтимоиву иқтисодӣ, балки ба сиёсати хориҷӣ бештар таваҷҷӯҳ зоҳир месозанд.
