Душанбе. 6-уми декабр. ОИ «Азия-Плюс» – Дар пойтахти Тоҷикистон – шаҳри Душанбе филиали Донишкадаи политехникии шаҳри Харкови Украина кушода мешавад. Дар ин хусус президенти Тоҷикистон Эмомалӣ Раҳмон ва ректори Донишгоҳи Харков Леонид Таважнянский зимни сафари давлатии президенти Тоҷикистон ба Украина тавофуқ ҳосил карданд.
Президенти Тоҷикистон изҳор доштааст, ки бисёр мутахассисони тоҷик дар ин мактаби олии шаҳри Харков таълим гирифтаанд. Тибқи иттилои сомонаи интеретии atn.kharkov.ua, президенти Тоҷикистон аз ректори донишгоҳ дархост кардааст, ки шумори квотаҳо барои таҳсили донишҷӯёни тоҷик дар ин донишгоҳ зиёд карда шавад.
Э.Раҳмон гуфтааст, ки айни замон дар ин донишгоҳ 30 донишҷӯи тоҷик таҳсил мекунанд, ки ин хеле кам аст ва афзудани квотаҳои мутахассисоне, ки Тоҷикистон ба онҳо эҳтиёҷ дорад, заруру саривақтӣ шуморидааст. «Ҳадди ақалл на камтар аз 100 донишҷӯи тоҷик бояд дар ин даргоҳи илм таҳсил кунад», – иброз доштааст ӯ.
