Душанбе. 4-уми феврал. ОИ «Азия-Плюс» – Дар Тоҷикистон бори навбатӣ болоравии қурби доллари амрикоӣ нисбат ба асъори миллӣ ба мушоҳида расид. Арзиши 1 доллари амрикоӣ имрӯз дар нуқтаҳои мубодилаи асъори пойтахт ба 4 сомонӣ расид. Гузашта аз ин, дар нуқтаҳои мубгодилаи асъор бинобар набудани доллари амрикоӣ аз фурӯши он худдорӣ менамоянд.
Тавре аз ҶСК «Агроинвестбонк» ба ОИ «Азия-Плюс» хабар доданд, субҳи дирӯз қурби доллар дар нуқтаҳои мубодилаи асъори ин бонк барои хариди 1 $ 3,75 сомонӣ ва фурӯши он 3,77 муқаррар шуда, соати 11-и рӯз қурби он мутаносибан аллакай то 3,80
ва 3,82 сомонӣ расид. «Феълан 1 $ дар нуқтаҳои мубодилаи асъори «Агроинвестбонк» бо арзиши 3,86 сомонӣ харида шуда, бо нархи 3,88 сомонӣ фурӯхта мешуд», – хабар дода буданд аз бонк. Имрӯз бошад, аллакай арзиши қабули доллар ба 3,98 сомонӣ ва фурӯши он ба 4 сомонӣ баробар шудааст.
Аз ҶСК «Бонки рушди Тоҷикистон» иттилоъ доданд, ки қаблан қурби доллари амрикоӣ дар нуқтаҳои мубодилаи асъори ин бонк 3,78 сомониро ташкил медод, вале дирӯз он аллакай то 3,88 сомонӣ афзудааст.
Тибқи иттилои сарчашма аз ҶСК «Тоҷиксодиротбонк», рӯзи пешин ва дирӯз дар 33 нуқтаи мубодилаи асъори ин бонк арзиши доллар дар як мизон нигоҳ дошта шуда, дар ин рӯзҳо нархи хариди он 3,78 ва фурӯши он 3,80 сомониро ташкил додааст. Имрӯз дар нуқтаҳои мубодилаи асъори ин бонк арзиши қабули доллар 3,88 ва фурӯши он 4 сомониро ташкил додааст.
Бонки миллии Тоҷикистон имрӯз қурби 1 доллари амрикоиро 3,72 сомонӣ муқаррар кардааст.
