Душанбе. 24-уми феврал. ОИ «Азия-Плюс» – Тоҷикистон то ҳанӯз бо ҶСК «Турбоатом»-и шаҳри Харкови Украина ҷиҳати омода сохтану таъмини нерӯгоҳи Норак бо таҷҳизот шартнома ба имзо нарасонидааст.
Ёдовар мешавем, зимни сафари давлатии президенти Тоҷикистон ба Украина иттилоъ дода шуд, ки сарвари давлат аз ин корхона боздид намуда, оид ба омода сохтану таъмини нерӯгоҳи Норак бо шаш гидротурбина гуфтушунид кард.
Он замон ВАО-и Украина гуфта буданд, Тоҷикистон ба корхонаи «Турбоатом» омода сохтани 6 гидротурбина бо арзиши ҳудуди 2 млн. $ фармоиш додааст ва шартнома то ахири моҳи декабри соли гузашта ба имзо мерасд.
Дар ҳамин ҳол, аз ширкати «Барқи тоҷик ба ОИ «Азия-Плюс» хабар доданд, ки ҷонибҳо то ҳанӯз сари нархи гидротурбинаҳо тавофуқ ҳосил накардаанд, зеро дар шароити бӯҳрони молӣ арзиши металл хеле поин рафт ва мутаносибан арзиши гидротурбинаҳо низ бояд поин биравад. Сарчашма оид ба додани маълумот дар бораи то кадом андоза паст шудани арзиши таҷҳизот худдорӣ кард.
