Душанбе. 26-уми феврал. ОИ «Азия-Плюс» – Дар ҷаласаи навбатии палатаи поёнии парлумони ҷумҳурӣ зимни ворид намудани тағйироту илова ба Қонуни ҶТ «Дар бораи хусусигардонии амволи давлатӣ» намояндагони мардумӣ оид ба ғайриқобили хусусигардонӣ будани нерӯгоҳҳои Нораку Роғун ва КВД «Талко» қарор ба тасвиб расониданд.
Зимни шарҳи масъалаи мазкур мудири кафедраи менеҷменти Донишгоҳи славянии Русияву Тоҷикистон Георгий Кошлаков дар сӯҳбати ихтисосӣ бо хабарнигори ОИ «Азия-Плюс» чунин ибрози ақида намуд, ки ба ӯ нофаҳмост, ки чӣ тавр метавон сохтмони нотамомро ба феҳристи иншооти ғайриқобили хусусигардонӣ шомил кард.
Коршинос мегӯяд, дар таҷрибаи ҷаҳонӣ чунин ҳодисаро дар хотир надорад. Ӯ изҳор дошт, ҳангоме иншоот ҳанӯз бунёд наёфтаву мушаххас нест аз ҳисоби кадом воситаҳо сохта мешавад, қабули қонун ва изҳори ғайриқобили хусусигардонӣ будани он мантиқан дуруст нест. «Тоҷикистон метавонад дар ин хусус танҳо дар сурати аз ҳисоби маблағҳои давлатӣ бунёд ёфтани иншоот ҳарф занад, ки ман ба ин алҳол шубҳа дорам», – гуфт ӯ.
Г.Кошлаков хотиррасон кард, ки ҳукумати ҷумҳурӣ чандин маротиба изҳор дошт, сохтмони нерӯгоҳ тавассути таъсиси Консорсиюми байнулмилалӣ идома дода мешавад ва дар он метавонанд кишварҳо ва созмонҳои хориҷӣ, аз ҷумла бахши соҳибкории хусусӣ низ ширкат варзад.
