Душанбе. 11-уми март. ОИ «Азия-Плюс» – Муовини директори маҷмааи табъу нашри «Шарқи озод» Умари Шерхон барои нашри маҷмӯаи «Тораҳои хаёл» ба ҷоизаи Ассотсиатсияи публитсистони Тоҷикистон дар соли 2008 сазовор дониста шуд.
Тавре котиби масъули Иттифоқи журналистони Тоҷикистон Пӯлод Нуров ба ОИ «Азия-Плюс» хабар дод, чанде қабл дар вазъи тантанавӣ ҷоизаро раиси ассосиатсия Муҳаммадҷон Тоштемиров ба ӯ супурд.
Ёдрас мекунем, ки соли гузашта сармуҳаррири рӯзномаи «Фараж» Хуршеди Атовулло барои силсилаи маводи публитсистӣ дар мавзӯи коррупсия ва озодии баён, директори шабакаи телевизионии «Симои мустақили Тоҷикистон» Зиннатуллои Исмоил барои силсилаи мавод дар мавзӯи иқтисод ва муовини сармуҳаррири ҳафтаномаи «Курер Таджикистана» Владимир Фролов барои маводи публитсистӣ дар мавзӯи ҳамкориву дӯстии мардуми Тоҷикистону Русия ба ин ҷоиза сазовор дониста шуда буданд.
