Душанбе. 11-уми апрел. ОИ «Азия-Плюс» – Дар Тоҷикистон барои сайёҳон раводиди нав ҷорӣ карда мешавад.
Тавре муовини раиси Кумитаи ҷавонон, варзиш ва сайёҳии назди ҳукумати ҶТ Лочин Файзуллоев дар ҷамъи рӯзноманигорон изҳор дошт, шурӯъ аз 27-уми апрел мувофиқи даъвати ширкатҳои сайёҳии кишвар ба консулгарии ВКХ ва намояндагиҳои ҶТ дар хориҷи кишвар ба сайёҳон раводиди сафар дода мешавад.
Номбурда гуфт, гузашта аз ин, тартиби сабти сайёҳон низ тағйир дода шуда, акнун сайёҳон бидуни қайд то 30 рӯз метавонанд дар Тоҷикистон ба сар баранд. «Қаблан сайёҳон барои фатҳи қуллаи кӯҳ то 6 ҳазор метр 50 $ ва бештар аз он 100 $ маблағ пардохт мекарданд, ки акнун он бекор карда шуд ва аз ин ба баъд пардохти маблағи 1 $ дар як рӯз барои будубош дар Тоҷикистон низ барҳам дода шуд», – гуфт ӯ ва афзуд, ки иқдомоти мазкур ба сайёҳон ҷиҳати сарфа намудани то 200 $ барои як маротиба сафар ба Тоҷикистон имкон фароҳам хоҳад сохт.
Зикр гардид, ки соли гузашта беш аз 400 ҳзор нафар сайёҳон аз Тоҷикистон боздид карданд.
