Душанбе. 15-уми апрел. ОИ «Азия-Плюс» – Геологҳои тоҷик мустақилона корҳои иктишофии газу нафтро дар қаламрави ҷумҳурӣ шурӯъ мекунанд.
Чӣ тавре ки сардори Сарраёсати геологияи назди ҳукумати ҶТ Азими Иброҳим ба ОИ «Азия-Плюс» хабар дод, бо ин мақсад гурӯҳи иборат аз 20 мутахассис ташкил гардида, он бо тамоми таҷҳизоти зарурӣ таъмин карда шудааст. «Дар марҳилаи аввал мутахассисони тоҷик дар ҳамдастӣ бо ширкати «Tethys Тajikistan Limited»-и Канада ба корҳои иктишофӣ машғул хоҳанд шуд», – гуфт ӯ.
А.Иброҳим гуфт, феълан ин ширкат ва як ширкати қазоқии дигар дар гирду атрофи пойтахт, аз ҷумла дар майдонҳои конҳои Комсомол, Хонақоҳ , Айнӣ ва Навобод ба корҳои иктишофӣ машғул мебошанд. «Айни замон 5 ширкат дар қаламрави Тоҷикистон корҳои ҷустуҷӯ ва иктишофи газу нафтро баргузор месозанд», – афзуд Азими Иброҳим.
