Душанбе. 7-уми май. ОИ «Азия-Плюс» – Чанде қабл дар хобгоҳи рақами 7-и Донишгоҳи омӯзгорӣ дар шаҳри Душанбе сӯхтор ба амал омад.
Тибқи иттилои расида ба ОИ «Азия-Плюс» аз Раёсати хадамоти оташнишонии Вазорати умури дохилии ҶТ, телевизоре, ки дар утоқи омӯзишӣ беназорат гузошта шуда буд, оташ гирфта, сипас он ба пардаҳо ва мебели утоқ гузаштааст. «Баробари огаҳӣ ёфтан кормандони хадамоти оташнишонӣ зуд ба ҷойи ҳодиса ҳозир шуда, дар муддати хеле кӯтоҳ оташро хомӯш карданд», – гуфт манбаъ ва афзуд, ки касе аз сӯхтор осеб надидааст.
Ба иттилои манбаъ, ин ҳодисаи шашуми сӯхтор дар муассисаҳои вазорати маорифи кишвар мебошад. «Аз оғози сол дар ҷумҳурӣ 371 сӯхтор рух дода, зарари моддии он 1 млн. 457 ҳазору 611 сомониро ташкил дод», – афзуд манбаъ.
