Душанбе. 20-уми май. ОИ «Азия-Плюс» – Ҳукумати Тоҷикистон аз СММ ва дигар созмонҳои байнулмилалӣ дархост кард, ки барои рафъи оқибатҳои офатҳои табиӣ ба ҷумҳурӣ кӯмаки таъҷилӣ расонанд. Дра ин бора маркази иттилооти СММ хабар медиҳад.
Дар муроҷиати ҳукумати ҶТ гуфта мешавад, дар маҷмӯъ зарари офатҳои табиӣ 40 шаҳру навоҳии кишварро фаро гирифта, миёни аҳолӣ талафоти ҷонӣ ба қайд гирифта шудааст. Ҳукумати Тоҷикистон ҳаҷми хисороти расидаро беш аз 100 млн. доллари ИМА арзёбӣ намуда, изҳор доштааст, ки тибқи маълумоти пешакӣ, дар кишвар 200 манзили зист пурра хароб гардида, садҳо иншооти зерсохтории таъиноти гуногун, аз ҷумла мактабу беморхонаҳо зарар диданд. Дар ҷумҳурӣ
160 км
қитъаи роҳи мошингардро селоб шуста, 40 пул вайрон шудааст ва хатҳои интиқоли барқ, зеристгоҳҳои барқ ва пойгоҳҳои обкашӣ корношоям гардиданд.
Дар муроҷиат зикр мегардад, ки бар асари офатҳои табиӣ ба заминҳои кишти маҳсулоти кишоварзӣ зарари зиёд расида, беш аз 3 ҳазор саршумори чорво нобуд гардид. Ҳукуматдорони Тоҷикистон баҳри кӯмак ба мардуми осебдида аз тамоми имконоти мавҷуда истифода мекунанд, вале Тоҷикистон қодир нест, ки мустақилона оқибатҳои офати табииро бартараф созад. Дар ҷумҳурӣ норасоии шадиди масолеҳи сохтмон, маводи сӯзишворӣ, ғизоӣ, доруворӣ, тухмӣ, хаймаҳои зист ва генераторҳои сайёр ба мушоҳида мерасад.
Дар мусоҳиба ба радиои СММ Намояндаи доимии Тоҷикистон дар СММ Сироҷиддин Аслов изҳор доштааст, ки айни замон ҳалли фаврии масъалаи бо ҷойи зисти муваққатӣ
таъмин намудани осебдидагон зарур буда, барои барқарор сохтани заминҳои кишт ва нашъунамои зироатҳо маблағҳои зиёде равона кардан лозим меояд, то ки деҳқонон дар мавсими соли равон ҳосили дилхоҳ ба даст оранд.
