Душанбе. 19-уми май. ОИ «Азия-Плюс» – Рӯзҳои 22-24-уми май дар шаҳри Душанбе ҷаласаи
XIII
-уми Шӯрои вазирони адлияи кишварҳои Иттиҳоди иқтисодии АвруОсиё (ЕврАзЭС) баргузор мешавад.
Чӣ тавре ки ба ОИ «Азия-Плюс» аз Вазорати адлияи ҶТ иттилоъ доданд, иштирокдорони ҷаласа ният доранд масоили марбут ба раванди ҳамоҳангсозии қонунгузории миллии кишварҳои узви иттиҳодро баррасӣ намуда, роҷеъ ба рушди низоми ҳуқуқии иттиҳод тавсияву пешниҳодот таҳия созанд.
Рӯзи 24-уми май пас аз анҷоми ҷаласа нишасти матбуотӣ доир мегардад.
Маълумотнома:
Дар таърихи 10-уми октябри соли 2000 дар шаҳри Остона сарони кишварҳои Белорус, Қазоқистон, Қирғизистон, Русия ва Тоҷикистон Шартномаи таъсиси Иттиҳоди иқтисодии Аврупо ва Осиёро (ЕврАзЭС) ба имзо расониданд, ки он муносиботи ҳамкориҳои кишварҳоро ба сатҳи сифатан нав бароварда, шаклҳои ҳуқуқӣ ва ташкилии муттаҳидшавии онҳоро муайян сохт. (Аз ҷониби ҳамаи кишварҳо тасдиқ гардида, аз 30-уми майи соли 2001 дар амал ҷорӣ шуд). Феълан Белорус, Қазоқистон, Тоҷикистон, Русия ва Қирғизистон ба ҳайти ЕврАзЭС шомил мебошанд. Ӯзбекистон моҳи январи соли 2006 ба иттиҳод
ҳамроҳ гардид, вале ахири соли 2008 эълом дошт, ки узвияти худро дар иттиҳод бозмедорад.
Молдова, Украина, Арманистон ва Бонки рушди авруосиёӣ дар назди иттиҳод мақоми нозирро доранд. Шурӯъ аз соли 2003 ЕврАзЭС дар Созмони Милали Муттаҳид ҳамчун созмони байнулмилалӣ ба қайд гирифта шуда, дар Ассамблеяи Генералии СММ мақоми нозирро соҳиб гашт.
