Душанбе. 15-уми июн. ОИ «Азия-Плюс» – Дар чаҳорчӯбаи сафари худ ба кишварҳои минтақаи Осиёи Марказӣ роҳбари ҳайати Ассамблеяи парлумонии Созмони Амният ва Ҳамкории Аврупо Жоао Соареш бо намояндагони аҳзоби сиёсии Тоҷикистон мулоқот орост.
Чӣ тавре ки ба ОИ «Азия-Плюс» сухангӯи раиси ҲНИТ Ҳикматулло Сайфуллозода иттилоъ дод, дар мулоқот масоили рушди равандҳои сиёсӣ дар ҷумҳурӣ ва бахусус мушкилоти омодагӣ ба интихоботи қарибулвуқӯъи парлумонӣ дар Тоҷикистон мавриди баррасӣ қарор гирифтанд. Жоао Соареш изҳор доштааст, ки ӯ ҷонибдори рақобати солим дар интихобот аст.
Дар мулоқот намояндагони аҳзоби сиёсӣ зикр кардаанд, ки аз ҷониби парлумон дар кишвар то ҳанӯз лоиҳаи пешниҳоднамудаи қонун дар бораи интихобот, ки аз ҷумла бекор кардани гаравпулии интихоботро дар назар дорад, қабул нашудааст. Дар суханронии худ раиси ҲНИТ Муҳиддин Кабирӣ интихоботи қарибулвуқӯъи парлумониро рӯйдоди муҳими сиёсӣ арзёбӣ намуда, изҳор доштааст, ки «он ҳам барои ҳукумат ва ҳам аҳзоби сиёсӣ имтиҳони ҷиддии навбатист».
